खामुंडीच्या धर्मनाथ दर्शनाला भाविकांची तुरळक गर्दी

आळेफाटा : खामुंडी येथील निसर्गरम्य परिसरात असलेल्या धर्मनाथ देवस्थान यात्रेनिमित्त यंदा भाविकांची तुरळक गर्दी निदर्शनास आली. बैलगाडा शर्यतीच्या घाटातही पूर्णपणे शुकशुकाट होता.

दरवर्षी यात्रेला जुन्नर, खेड, आंबेगाव, पारनेर, अकोले, मुरबाड आदी तालुक्यांतील भाविक भक्तांची मोठ्या प्रमाणात गर्दी होत असते, परंतु वर्षानुवर्ष चालत आलेली बैलगाडा शर्यतींची परंपरा या वर्षी कायद्याने बंद असल्यामुळे व कोरोनाच्या पार्श्वभूमीवर येथील बैलगाडा शर्यतीच्या घाटातही पूर्णपणे शुकशुकाट होता. बैलगाडा शर्यतबंदीचा मोठा आर्थिक फटका वडापाव, भेळ, आइस्क्रीम, रसवंतीगृह, पाणी व खेळणी विक्रेते या छोट्या व्यावसायिकांना बसला आहे. बैलगाडा शर्यतबंदीमुळे जनसामन्यांमध्ये तीव्र स्वरूपाच्या संतापी प्रतिक्रिया उमटत होत्या. काळभैरवनाथ ट्रस्टचे अध्यक्ष मारुती बाबूराव शिंगोटे आणि सचिव संदीप पांडुरंग गंभीर यांनी माहीिती दिली की, सर्वोच्च न्यायालयाने घातलेल्या बैलगाडा शर्यतबंदीमुळे या वर्षी निराशा होऊन यात्रेत मोठा शुकशुकाट पहायला मिळाला. देवदर्शनाच्या निमित्ताने जमलेल्या भाविकांमध्ये यावेळी एकच चर्चा दिसून आली. ती म्हणजे बैलगाडा शर्यतीवरील बंदी उठणार कधी? आणि यात्रेचा पुन्हा आनंद कधी? घेता येणार? खामुंड़ी गावचे नवनिर्वाचित सरपंच वनराज शिंगोटे, उपसरपंच विश्रांती बोडके यांचे हस्ते धर्मनाथाची विधिवत पूजा व अभिषेक करण्यात आला, त्यानंतर दिवसभर सहकुटुंब सहपरिवार बैलगाडीत बसण्याचा आनंद घेत भाविक धर्मनाथ दर्शनासाठी येत होते. जनसेवा ग्रुपच्या वतीने पिण्याच्या पाण्याची व्यवस्था करण्यात आली होती. दरम्यान, ग्रामपंचायत सदस्य दशरथ जगताप, सत्यवान डुंबरे, दीपाली सासवडे, मंगल जगताप, सागर कोकाटे, सुरेखा भोर, कल्पना कोकाटे, उद्योजक सुभाष बोडके, अनिल बोडके, डॉ. माया गंभीर, अक्षय शिंगोटे, कैलास बोडके, संतोष शिंगोटे, जितेंद्र रोकडे, कौतुभ गंभीर, नवनाथ शिंगोटे, पांडुरंग बोडके, शहाजी जाधव, दिलीप बोडके आदी उपस्थित होते.

खामुंडी येथे बैलगाडा शर्यतबंदीमुळे घाटात शुकशुकाट.