बारामतीतील धक्कादायक प्रकार; पत्रकार युवकावर गोळीबार

पत्रकाराला बारामती हॉस्पिटलमध्ये उपचारासाठी दाखल करण्यात आले आहे

बारामती : बारामती शहरात भिगवण रस्त्यावर रिलायन्स पेट्रोलपंपानजीक गोळीबार झाल्याचा प्रकार घडला आहे. सुत्रांनी दिलेल्या माहितीनुसार, आकाश सुभाष जाधव (वय ३०)  असे युवकाचे नाव आहे.

गुरुवारी(दि ३)भिगवण रस्त्यावरील रिलायन्स पेट्रोल पंपासमोर हा प्रकार घडला आहे. सायंकाळी हा प्रकार घडला आहे. पोलिसांचा याबाबत अ्द्याप तपास सुरु असुन गोळीबार झाल्याबाबत अधिकृत माहिती देण्यास नकार दिला आहे. तपासानंतरच गोळीबाराबाबत सांगणे योग्य ठरले,अशी सावध भूमिका पोलीस अधिकाऱ्यांनी घेतली आहे. उपविभागीय पोलीस अधिकारी गणेश इंगळे यांच्यासह कर्मचारी घटनास्थळी पोहचले आहेत.

शहरातील युवकांच्या दोन गटात भांडणे झाली. यामध्ये आकाश सुभाष जाधव (वय ३०)  या युवकावर सायंकाळी ६ वाजता गोळी झाडण्यात आली. तसेच जाधव हे पत्रकार असल्याची प्राथमिक माहिती मिळत आहे. तो तांदुळवाडी येथील युवक जखमी झाल्याची चर्चा आहे. मात्र,भांडणाच्या कारणाबाबत अधिकृत माहिती मिळालेली नाही. बारामती हॉस्पिटलमध्ये उपचारासाठी दाखल करण्यात आले आहे. दुचाकीवरुन आलेल्या काहींनी हा गोळीबार केल्याचे समजते. याबाबत डॉ.दिपक महाडीक यांनी‘लोकमत’शी बोलताना सांगितले कि, जाधव यांच्या छातीला डाव्या बाजुला लागली आहे. ती गोळी किडनीला जखम होऊन  ती गोळी मणक्यामध्ये अडकली आहे. या युवकाची प्रकृती सध्या स्थिर असल्याचे डॉ.महाडीक यांनी सांगितले.