टमटम चालकाची एसटी बसच्या चालकाला मारहाण; इंदापूर एसटी बसस्थानकाच्या आवारातील घटना

ठळक मुद्देइंदापूर एसटी बसस्थानकाच्या आवारात एका टमटम चालकाने एसटी बसच्या चालकाला मारहाण केल्याची घटना घडली आहे. इंदापूर  बस स्थानकाच्या प्रवेशद्वाराजवळ  बेकायदा प्रवासी वाहतूक करणारी टमटम (क्र.एमएच ४२ एम- ४१७१) आडवी लावण्यात आली होती.

इंदापूर, दि. 26- इंदापूर एसटी बसस्थानकाच्या आवारात एका टमटम चालकाने एसटी बसच्या चालकाला मारहाण केल्याची घटना घडली आहे.  इंदापूर एसटी बसस्थानकाच्या आवारात एसटी बसला आडवी लावण्यात आलेली बेकायदा प्रवासी वाहतूक करणारी टमटम बाजुला घेण्यास सांगितल्याने राग येवून टमटम चालकाने एसटी बसच्या चालकाला मारहाण केल्याची घटना शनिवारी दुपारी बारा वाजण्याच्या सुमारास बस स्थानकाच्या आवारात घडली. एल.एस.लोमटे असे एसटी बस चालकाचे नाव आहे. इंदापूर आगारात तो कार्यरत आहे. इंदापूर- बारामती अशी प्रवासी वाहतूक करणारी एसटी बस (क्र.एम एच १४ बी टी २८६६) घेवून तो इंदापूरला येत होता.

इंदापूर  बस स्थानकाच्या प्रवेशद्वाराजवळ  बेकायदा प्रवासी वाहतूक करणारी टमटम (क्र.एमएच ४२ एम- ४१७१) आडवी लावण्यात आली होती. तिला एसटी घासेल, म्हणून लोमटे यांनी टमटम चालक राजेंद्र चोरमले    ( रा.शिरसोडी, ता.इंदापूर) यास ती बाजुला घेण्यास सांगितले .या कारणावरुन राग येवून चोरमले याने वाद घालत लोमटे यांना मारहाण केली. चोरमले यास पोलीसांनी ताब्यात घेतले आहे.
परस्परांविरुद्ध इंदापूर पोलीस ठाण्यात तक्रार नोंदवण्याचे काम चालू आहे.