शहरात दहशत पसरविणा-या तडीपार सराईताला अटक

पुणे : जिल्ह्यातून तडीपार असताना देखील आदेशाचा भंग करून भवानी पेठेतील चुडामन तालीम येथे दहशत माजविणा-या सराईताला गुन्हेशाखेच्या युनिट १ ने अटक केली. अरबाज ऊर्फ बब्बन इक्बाल शेख (२३, रा. भवानी पेठ) असे अटक करण्यात आलेल्या सराईताचे नाव आहे.

दि.२३ जून रोजी अंमलदार अजय थोरात यांना त्याच्या खब-याकडून अरबाज हा चुडामन तालीम येथे नागरिकांना शिवीगाळ करून त्यांच्यात दहशत निर्माण करत असल्याची माहिती मिळाली. त्यानुसार गुन्हे शाखेचे पोलीस तत्काळ घटनास्थळी पोहचले. दरम्यान, पळून जाण्याच्या तयारीत असताना अरबाजला जेरबंद करण्यात आले. त्याच्याकडून प्राणघातक हत्यार जप्त करण्यात आले. त्याला ४ जोनवारी रोजी परिमंडळ एकच्या उपायुक्त डॉ. प्रियंका नारनवरे यांनी दोन वर्षांसाठी तडीपार केले होते. असे असताना दहशत माजवताना अरबाजला अटक केली. त्याच्यावर खुनाचा प्रयत्न, हत्यारानिशी दहशत निर्माण करणे, घरफोडी, खंडणी व चोरीचा गुन्हा दाखल आहे. गुन्हे शाखेच्या युनिट १ चे वरिष्ठ पोलीस निरीक्षक भरत जाधव, उपनिरीक्षक संजय गायकवाड, उपनिरीक्षक सुनील कुलकर्णी, अंमलदार विजेसिंग वसावे, अजय थोरात, अशोक माने, अमोल पवार, अय्याज दड्डीकर यांच्या पथकाने ही कारवाई केली.