गणेशोत्सवात सांभाळा तुमच्या जीवश्च कंठश्च सख्याला! ६ दिवसात तब्बल ९२७ मोबाइल चोरीला गेल्याच्या तक्रारी

मोबाइलच्या ११ आकडी आयएमईआय नंबरचा वापर करून शोध घेतला जातो

पुणे : मोबाइल हा आता केवळ वस्तू राहिलेला नाही. त्यामध्ये आपल्या सर्व आठवणी, महत्त्वाचे नंबर, अनेक सुखदु:खाचे प्रसंग चित्रित केलेले व्हिडीओ जीवापाड जपलेले असतात. त्यामुळे मोबाइल हा आता सर्वांचा सख्या, मित्र-मैत्रिणीपेक्षा अधिक झाला आहे. जीवनाचे सर्व अंग व्यापून राहिलेला हा मोबाइल चोरीला गेला तर? पुणे पोलिसांच्या "लॉस्ट अँड फाउंड" या ऑनलाइन पोर्टलवर गणेशोत्सवादरम्यान (दि. १९ ते २४ सप्टेंबर २०२३) ९२७ मोबाइल चोरीच्या तक्रारी नोंद झाल्याची माहिती पोलिसांनी दिली आहे.

सर्वाधिक मोबाइल चोरी विसर्जन मिरवणुकीत होते. त्यात ही बेलबाग चौक ते मंडई या परिसरात जेव्हा महत्त्वाचे गणपती मिरवणुकीत सहभागी होतात, तेव्हा या घटना अधिक होतात. तेव्हा देखावे पाहताना तसेच मिरवणुकीत आपला मोबाइल याकडे लक्ष द्या, असे आवाहन पुणे पोलिसांकडून करण्यात आले आहे.

मोबाइल चोरी किती, सापडले किती?

गणेशोत्सव सुरू होऊन ६ दिवस झाले आहेत. यादरम्यान पुणे पोलिसांच्या 'लॉस्ट ॲन्ड फाउंड'वर ९२७ तक्रारी आल्या असून, फक्त २५ मोबाइल रिकव्हर झालेले आहेत. गेल्या आठ महिन्यात तब्बल २५ हजार ५५७ मोबाइल चोरीच्या तक्रारी नोंदवण्यात आलेल्या आहेत. त्यापैकी ७६१ मोबाइल रिकव्हर करण्यात पाेलिसांना यश आले आहे.

शोध कसा लागतो?

पोलिसांचे तांत्रिक विश्लेषण करणारे पथक असते. मोबाइलच्या ११ आकडी आयएमईआय नंबरचा वापर करून मोबाइलचे लोकेशन मिळवले जाते. त्यानुसार मोबाइल तज्ज्ञ हरवलेल्या मोबाइलचा मागोवा घेतात.

मोबाइल चोरीला गेला तर हे कर...

https://admin.punepolice.gov.in/LostFoundReg या पोर्टलवर जा.

- तेथे दिलेला सर्व तपशील व्यवस्थित भरा.

- त्यानंतर कॅप्चा टाकून "सबमिट" या बटणावर क्लिक करा.

- नॅशनल वेबसाइट https://ceir.gov.in यावरही तक्रार करता येते.