भिगवण ग्रामपंचायत सरपंचपदी तानाजी वायसे

---

भिगवण : भिगवण ग्रामपंचायत सरपंच-उपसरपंचपदाच्या निवडणुकीत हर्षवर्धन पाटील समर्थक तानाजी अनिल वायसे व उपसरपंचपदी शीतल बाबासाहेब शिंदे यांची सर्वांनुमते बिनविरोध निवड करण्यात आली. निवडणूक निर्णय अधिकारी एस. पी. महानवर यांनी दोन्ही नावांची घोषणा केली.

भिगवण ग्रामपंचायतीची निवडणूक ही अत्यंत चुरशीने लढवली गेली. हर्षवर्धन पाटील समर्थक दिवंगत नेते रमेश जाधव प्रेरित श्रीनाथ ग्रामविकास पॅनलने राष्ट्रवादी काँग्रेस पुरस्कृत श्री भैरवनाथ पॅनलला धूळ चारत सतरापैकी सोळा जागांवर विजय मिळवला. भिगवण ग्रामपंचायतीवर एकहाती वर्चस्व स्थापन केले. सरपंच-उपसरपंचपदाच्या निवडणुकीत सर्वसामान्य व शेतकरी कुटुंबातील तानाजी वायसे व शीतल शिंदे यांच्या निवडीमुळे भिगवणकरांनी समाधान व्यक्त केले.

या वेळी पॅनलप्रमुख पराग जाधव, उपसभापती संजय देहाडे, गटनेते संपत बंडगर, तुकाराम भरणे, अशोक शिंदे, अशोक रायसोनी, अजित क्षीरसागर, अभिमन्यू खटके, गुलामभाई शेख, जावेद शेख, खंडेराव गाडे व सर्व ग्रामपंचायत सदस्य उपस्थित होते.

निवडणूक निर्णय अधिकारी म्हणून एस. पी. महानवर, सहायक निवडणूक अधिकारी डी. ए. गाडेकर व ग्रामविस्तार अधिकारी डी. बी. परदेशी यांनी काम पाहिले.