लस घेणारे तन्मय फडणवीस

हेल्थ वर्कर आहे की अभिनेता?

‘हेल्थ केअर वर्कर’ म्हणून लस घेतल्याची बाब झाली उघड

बारामती : काही दिवसांपूर्वी वयाच्या नियमाचे उल्लंघन करत माजी मुख्यमंत्री आणि विरोधी पक्षनेते देवेंद्र फडणवीस यांचे पुतणे तन्मय फडणवीस यांनी लस घेतली होती. त्यावरून टीका झाली होती. मात्र, तन्मय यांनी ‘हेल्थ केअर वर्कर’ म्हणून लस घेतल्याचे समोर आले.

सोमेश्वरनगर (ता. बारामती) येथील माहिती अधिकार कार्यकर्ते नितीन यादव यांनी माहिती अधिकारात मागविलेल्या माहितीतून ही बाब उघड झाली आहे. मात्र, तन्मय यांच्या ट्विटर अकाऊंटवर त्यांचा ‘अभिनेता’ असा उल्लेख आहे. त्यामुळे तन्मय नक्की कोण आहे? याचा खुलासा विरोधी पक्षनेते देवेंद्र फडणवीस यांनी करावा, असे आवाहन नितीन यादव यांनी केले आहे.

तन्मय फडणवीस हे विरोधी पक्षनेते देवेंद्र फडणवीस यांचे पुतणे आणि माजी मंत्री शोभा फडणवीस यांचे सख्खे नातू आहेत. काही दिवसांपूर्वी वयाच्या नियमात बसत नसतानाही त्यांनी कोरोनावरील लस घेतली होती. तन्मय यांच्या ट्विटरवर पाहिले तर त्यांनी ‘अभिनेता’ असल्याचे नमूद केले आहे. परंतु राज्य सरकारकडे लस घेत असताना ‘हेल्थ केअर वर्कर’ म्हणून त्यांनी उल्लेख केला असल्याची माहिती यादव यांना माहिती अधिकारात उघड झाली आहे. यादव यांनी ही माहिती मागवली होती.