हडपसर भागात टोळक्यांची दहशत

लोकमत न्यूज नेटवर्क

पुणे : नववर्षाच्या पहाटे कोथरूडमध्ये टोळक्याने दहशत करून दुचाकींची तोडफोड केल्याची घटना ताजी असतानाच हडपसर भागात टोळक्याने एका मोटारचालकाला धमकावून मारहाण केली. त्यानंतर या टोळक्याने परिसरातील दोन वाहनांची तोडफोड केली.

याप्रकरणी सूरज परमेश्वर खरात (वय १९, रा. साडेसतरानळी, हडपसर), आकाश रघुनाथ यादव (वय १९,रा. आळंदी रस्ता, भोसरी), रोहित राम सुनेवाड (वय १९, रा. गंगानगर, फुरसुंगी) यांना अटक केली. याप्रकरणी ह्रषीकेश दानवले (वय २६, रा. ढमाळवाडी, ता. हवेली) यांनी हडपसर पोलिसांकडे फिर्याद दिली आहे. दानवले आणि त्यांचा मावसभाऊ मोटारीतून गंगानगर परिसरातून मोटारीतून निघाले होते. त्यावेळी दुचाकीवरून आरोपी खरात, यादव, सुनेवाड निघाले होते. दानवले यांच्या गाडीपुढे रस्त्यात त्यांनी गाडी घसरली असल्याचे दाखविले. दानवले रस्त्यात पडलेल्या आरोपींना मदत करण्यास गेले. त्यानंतर आरोपींनी दानवले यांना मारहाण करण्यास सुरुवात केली. दानवले यांच्या मोटारीची काच फोडली. त्यावेळी तेथे असलेल्या दोन वाहनांची तोडफोड केली. आरोपी खरात, यादव, सुनेवाड यांनी कोयता उगारून परिसरात दहशत निर्माण केली.