राष्ट्रवादी काँग्रेस इंदापूरचा चेहरा मोहरा बदलणार : आमदार भरणे

इंदापूर शहरातील शाहुनगर भागातील ६० लाख रुपये खर्चाच्या अंतर्गत रस्ते, ड्रेनेज कामांचे भूमिपूजनप्रसंगी ते बोलत होते...

इंदापूर (पुणे) :राष्ट्रवादी काँग्रेसचइंदापूरचा चेहरामोहरा बदलणार आहे, अशी ग्वाही आ. दत्तात्रय भरणे यांनी दिली. इंदापूर शहरातील शाहुनगर भागातील ६० लाख रुपये खर्चाच्या अंतर्गत रस्ते, ड्रेनेज कामांचे भूमिपूजनप्रसंगी ते बोलत होते. राष्ट्रवादी काँग्रेसचेपुणे जिल्हाध्यक्ष प्रदीप गारटकर कार्यक्रमाच्या अध्यक्षस्थानी होते.

आ. भरणे म्हणाले की, शहरातील बहुतांश ठिकाणच्या रस्त्यांची व ड्रेनेजची कामे पूर्णत्वास गेली आहेत. सर्व शासकीय कार्यालयांचे एकत्रित केलेले प्रशासकीय भवन, नव्याने उभारलेल्या नगरपरिषद, न्यायालय, औद्योगिक प्रशिक्षण संस्थेच्या इमारती व प्रत्येक चौकाचे सुशोभिकरण यामुळे शहराला नवी ओळख मिळाली आहे. राष्ट्रवादी काँग्रेस पक्षाच्या माध्यमातून हे झाले आहे. आगामी काळात राष्ट्रवादी काँग्रेस इंदापूर शहर व तालुक्याचा चेहरामोहरा बदलणार आहे, असे ते म्हणाले. यावेळी संक्रांतीनिमित्त आ. भरणे व गारटकर यांच्या हस्ते महिलांना तीळगुळाचे वाटप करण्यात आले.

राष्ट्रवादी काँग्रेसचे शहराध्यक्ष बाळा ढवळे, नगरसेवक पोपट शिंदे, अनिकेत वाघ, राजेश शिंदे, श्रीधर बाब्रस, अनिल राऊत, सौरभ शिंदे यांसह पदाधिकारी, कार्यकर्ते उपस्थित होते.