घड्याळाचे गूढ उकलले;  प्रवीण चव्हाण यांच्या कार्यालयात नेमकं कसं केलं स्टिंग ऑपरेशन?, जाणून घ्या

विशेष सरकारी वकील प्रवीण चव्हाण यांच्या कार्यालयात लावलेल्या घड्याळामध्ये स्पाय कॅमेरा बसवून हे स्टिंग ऑपरेशन करण्यात आल्याचा आरोप करण्यात आला होता.

पुणे : विशेष सरकारी वकील प्रवीण चव्हाण यांना आपण कोणतेही घड्याळ भेट दिले नसून, त्यांनी अकारण आपल्यावर आरोप केला आहे. स्टिंग ऑपरेशनमुळे प्रवीण चव्हाण यांचा काळा चेहरा समोर आल्याचे तेजस मोरे यांनी सांगितले.

आपल्या कार्यालयात तेजस मोरे याने भेट दिलेल्या घड्याळात स्पाय कॅमेरा बसविला होता, त्यातून हे स्टिंग ऑपरेशन केल्याचा आरोप चव्हाण यांनी केला होता. यावर तेजस मोरे यांनी बाजू मांडली. मोरे म्हणाले की, ॲड. चव्हाण खोटे बोलत आहेत. त्यांच्या कार्यालयात घड्याळ अथवा छुपा कॅमेरा बसविला नाही. त्यांनी माझ्यावर खोटे आरोप केले. त्यांनी पुरावे द्यावेत.

ॲड. चव्हाण यांच्याशी असलेल्या संबंधाबाबत तेजस मोरे यांनी सांगितले की, मी सुरुवातीला त्यांना देव मानत होतो. मी पाच महिने तुरुंगात होतो. त्यांनी जामिनावर माझी सुटका केली. त्यांच्या कार्यालयात असताना एकदा त्यांच्या इंग्रजी ग्रामरमधील काही चुका मी दुरुस्त केल्या होत्या. माझे इंग्रजी चांगले असल्यामुळे विविध खटल्यांतील जबाब ते सांगतील त्या पद्धतीने मी इंग्रजीत टाईप करून देत होतो. अनेकांचे जबाब मी नोंद केले आहेत. मला कायद्याचे ज्ञान नसल्याने असे जबाब तयार करून देण्याचे सरकारी वकिलाचे कामच आहे, असा माझा समज होता.

भोईटे यांच्या घरी बनावट पुरावे पेरले-

भाजप नेते गिरीश महाजन यांच्या प्रकरणाशी संबंधित जबाबदेखील मी तयार केले. ९ जानेवारी रोजी पुणेपोलिसांनी भोईटे व इतरांच्या जळगावमधील घरी छापे घातले. पुणे पोलिसांनी भोईटे यांच्या घरी बनावट पुरावे प्लांट केले होते. तेव्हापासून मी ॲड. चव्हाण यांच्यापासून दूर गेल्याचा गौप्यस्फोट त्यांनी केला. 

गिरीश महाजन यांना अडकविण्यासाठी आधी अनिल देशमुख आणि नंतर एकनाथ खडसे यांनी सांगितल्याचे चव्हाण सांगत होते. मी लवकरच माध्यमांसमोर प्रत्यक्षात येणार असल्याची माहिती तेजस मोरे यांनी दिली आहे.

...आणि घड्याळाचे गूढ उकलले 

विशेष सरकारी वकील प्रवीण चव्हाण यांच्या कार्यालयात लावलेल्या घड्याळामध्ये स्पाय कॅमेरा बसवून हे स्टिंग ऑपरेशन करण्यात आल्याचा आरोप करण्यात आला होता. हे स्टिंग ऑपरेशन कसे करण्यात आले, याविषयी अनेक तर्क केले जात होते. पण, हे गूढ आता उकलले आहे.

हे घड्याळ लावल्यानंतर काही दिवसांनी बंद पडले. चाचू नावाची व्यक्ती घड्याळ दुरुस्त करते, असे सांगून घेऊन जात, पुन्हा आणून बसवत असे. असे दोन-तीन वेळा झाले. एकदा तो घड्याळ घेऊन आलेला सीसीटीव्हीमध्ये दिसून येतो. मात्र, त्याला काहीतरी संशय आल्याने बहुधा तो परत निघून गेला. त्यानंतर त्याने परत कधी घड्याळ आणून बसविले नाही. घड्याळ दुरुस्त करण्याच्या नावाखाली त्यातील स्काय कॅमेऱ्यातून हा सर्व डाटा काढून घेण्यात येत होता, असा संशय व्यक्त केला जात आहे.