Pune: वृद्धेला मारहाण करत दागिने ओरबाडून चोरटा पसार; इंदापुरातील घटना

रात्री उशिरापर्यंत इंदापूर पोलिसांकडे गुन्हा नोंद करण्याचे काम सुरू होते...

इंदापूर (पुणे) : दुचाकीवरून घरी सोडण्याचा बनाव करून निर्जनस्थळी नेत बेदम मारहाण करून ऐंशी वर्षे वयाच्या वृद्धेचे दागिने ओरबाडून काढून नेल्याचा प्रकार आज (दि. २७) घडला. त्यानंतर वृद्धेच्या गळ्यातले व कानातील दागिने अक्षरश: ओरबाडून काढून तिला जबर मारहाण केल्याने तिचे हात, पाय, गळा व कानाला गंभीर जखमा झाल्या आहेत. रात्री उशिरापर्यंत इंदापूर पोलिसांकडे गुन्हा नोंद करण्याचे काम सुरू होते.

रुक्मिणी पांडुरंग करगळ (वय ८० वर्षे, रा. वनगळी, ता. इंदापूर) असे या प्रकरणातील वृद्धेचे नाव आहे. सकाळी औषधे आणण्यासाठी ती आपल्या गावाकडून इंदापूरला आली होती. दुपारी औषधे घेऊन घराकडे परतत असताना शहरातील बाब्रस पेट्रोल पंपाच्या जवळ पाठीमागून लुना गाडीवरून आलेल्या हेल्मेट घातलेल्या अज्ञात व्यक्तीने तिला घरी सोडण्याची तयारी दाखवली. तिला दुचाकीवर बसवले. नजीकच्या पेट्रोल पंपावर दुचाकीत पेट्रोलही भरले. मात्र, नंतर बाह्यवळण रस्त्याने त्याने दुचाकी सरडेवाडी टोल नाक्याच्या दिशेने नेली.

दरम्यान, त्या वृद्धेला निर्जनस्थळी नेऊन तिला बेदम मारहाण करीत तिच्या गळ्यातील व दोन्ही कानांतील दागिने हिसका देऊन ओरबाडून काढले. त्यानंतर त्या व्यक्तीने तेथून पोबारा केला. एकाच महिन्यात दोन वेळा ज्येष्ठ नागरिकांना लुटण्याचे प्रकार इंदापुरात घडले आहेत. त्यामुळे ज्येष्ठ नागरिकांमध्ये घबराट पसरली आहे. चोरट्यांचा बंदोबस्त करण्याची मागणी होत आहे.