तृतीयपंथीयाने अनाथ अल्पवयीन मुलीला ढकलले वेश्या व्यवसायात

पुणे : आईवडिलांच्या मृत्यूनंतर ती अल्पवयीन मुलगी अनाथ बनली. तिच्या परिस्थितीचा गैरफायदा घेत तृतीयपंथीयाने तिला जबरदस्तीने वेश्या व्यवसायात ढकलले. यात झालेल्या अत्याचारातून ती गर्भवती राहिली आणि तिने एका मुलाला जन्म दिला. त्यानंतर हा प्रकार उघडकीस आला.

विमानतळ पोलिसांनी पोस्को अंतर्गत याप्रकरणी गुन्हा दाखल केला आहे. माया महादेव ऊर्फ आरती काळे, तृतीयपंथी महादेव ऊर्फ भारती काळे (दोघे रा. कलवड जकात नाक्याजवळ, धानोरी) आणि अन्य ३ अज्ञातांविरोधात गुन्हा दाखल झाला आहे. याप्रकरणी १७ वर्षाच्या मुलीने फिर्याद दिली आहे.

फिर्यादी मुलीच्या आईवडिलांचा मृत्यू झाला असून ती लोहगावातील एका महिलेकडे राहण्यास आली. तिची माया व महादेव काळे यांच्याशी ओळख झाली. त्यांनी या अल्पवयीन मुलीकडून वेश्या व्यवसाय करुन घेण्यास सुरुवात केली. ओळखीच्या ग्राहकांकडून पैसे घेऊन तिला वेश्यागमनासाठी खराडी येथील सूर्या लॉज येथे पाठवले जात असे. त्यातून ही मुलगी गर्भवती राहिली. तिने ९ जानेवारीला ससून रुगणालयात एका मुलाला जन्म दिला. पोलिसांनी महिला दक्षता समितीच्या महिला सदस्यांच्या उपस्थितीत तिचा जबाब नोंदवून घेतला. त्यावरुन गुन्हा दाखल करण्यात आला आहे.