अल्पवयीन मुलीचा विनयभंग करणाऱ्याला तीन वर्षे सक्तमजुरी

पुणे : घरात एकटीच असल्याचा फायदा घेत अल्पवयीन मुलीचा विनयभंग केल्याप्रकरणी एकाला न्यायालयाने तीन वर्षे सक्तमजुरी व ५ हजार रुपये दंडाची शिक्षा सुनावली. विशेष न्यायाधीश एस. एच. ग्वालानी यांनी हा आदेश दिला. दंडाची रक्कम न भरल्यास अतिरिक्त तीन महिने सक्त कारावास भोगावा लागेल, असेही आदेशात न्यायालयाने नमूद केले आहे.

संतोष अशोक शिंदे (वय ३५) असे शिक्षा झालेल्याचे नाव आहे. ही घटना ७ नोव्हेंबर २०१८ रोजी वाकड परिसरात घडली. पीडिता ही घरी एकटीच होती. संतोष शिंदे हा त्यांच्या घरात शिरला. यावेळी, त्याने पीडितेचे केस धरून तिला मिठी मारत अश्लील वर्तन केल्याचे फिर्यादित नमूद करण्यात आले. याप्रकरणात, महिला पोलीस उपनिरीक्षक कविता रूपनर व नकुल न्यामाने यांनी तपास करून आरोपीविरोधात भारतीय दंड विधान कलम ३५४, सह लैंगिक अपराधापासून बालकांचे संरक्षण अधिनियम सन २०१२ चे कलम ७ सह ८ प्रमाणे गुन्हा केल्याचे दोषारोपपत्र न्यायालयात दाखल केले.

याप्रकरणात सरकारी वकील विलास घोगरे पाटील यांनी एकूण पाच साक्षीदार तपासले. आरोपी याने पिडितेशी यापुवीर्ही असेच वर्तन करण्याचा प्रयत्न केला होता. यावेळी, पीडित मुलीने व तिच्या आईने आरोपीच्या आईस त्याला समजावून सांगा, असे सांगितले होते. मात्र, त्यानंतरही आरोपीच्या वर्तनात काहीही फरक पडला नाही.

आरोपीस निर्दोष सोडल्यास पुन्हा असे कृत्य करण्याची शक्यता नाकारता येणार नाही म्हणून आरोपीस जास्तीत जास्त शिक्षा देण्याची मागणी ॲड. घोगरे-पाटील यांनी युक्तिवादादरम्यान केली. न्यायालयाने ती मान्य करत आरोपीस शिक्षा सुनावली. याप्रकरणात हिंजवडी पोलिस ठाण्याचे हवालदार दिपक गायकवाड यांनी न्यायालयीन कामकाजासाठी साहाय्य केले.