'राम जन्मला ग' सखीचा सूर यंदा मात्र हरवला, कोरोना प्रादुभार्वामुळे रामनवमीचा उत्सव सलग दुसऱ्या वर्षी रद्द

पुणे शहरातील काही भागात रामनवमी साधेपणाने साजरी

ठळक मुद्देकोरोनाचा प्रादुर्भाव वाढल्यामुळे शहरातील सर्व धार्मिक स्थळ बंद

पुणे: 'राम जन्मला ग सखी राम जन्मला' चे हरवलेले सूर...ना आकर्षक विद्युत रोषणाई...ना भजन कीर्तनाने रंगणारा आसमंत...अशा वातावरणात सलग दुस-या वर्षी रामनवमी साधेपणाने साजरी करण्यात आली. कोरोनाचा प्रादुर्भाव वाढल्यामुळे शहरातील सर्व धार्मिक स्थळ बंद ठेवण्यात आली आहेत. मात्र रामनवमीनिमित्त अर्ध्या ते एक तासासाठी राममंदिरे उघडून रामजन्म सोहळा मंदिरांच्या विश्वस्तांच्या उपस्थितीत धार्मिक पद्धतीने पार पडला.

शहरामध्ये संचारबंदी लागू असल्याने हा अनुपम सोहळा भाविकांना ’याचि देही याचि डोळा’ अनुभवता आला नाही. शहरात गेल्या अनेक वर्षांपासून रामनवमी दिनी श्रीराम जन्मसोहळा मोठ्या उत्साहात साजरा केला जातो.  मठ-मंदिरात भजन, कीर्तन, प्रवचन इत्यादी कार्यक्रमांनी भक्तीमय वातावरण निर्माण होते. काही ठिकाणी रामायण ग्रंथाचे वाचन, रामकथेचे निवेदन, गीत रामायणाचे गायन वगैरे कार्यक्रमही केले जातात. मात्र, यावर्षी साधेपणाने नवमी साजरी करण्यात आली. शहरातील सर्वांत जुन्या मंदिरांपैकी तुळशीबागेतील राम मंदिरा अडीचशे वर्षे जुने आहे. चैत्र शुद्ध प्रतिपदा म्हणजेच गुढीपाडव्यापासून रामनवमीनिमित्त मंदिरामध्ये रामनवमीचा उत्सव साजरा केला जातो. रामजन्मापूर्वी रामाला परिधान करण्यात येणाऱ्या पोषाखाची मिरवणूक काढण्याची परंपरा आहे. मुख्य पूजा आणि रामजन्म सोहळा झाल्यावर रामाच्या वस्त्राचा लाल रंगाचा तागा भाविकांना प्रसाद म्हणून वाटला जातो. करोना प्रादुभार्वामुळे रामनवमीचा उत्सव यंदा सलग दुसऱ्या वर्षी रद्द करण्यात आला. नागरिकांनी मंदिरांमध्ये दर्शनासाठी येणे टाळावे असे आवाहन करण्यात आले होते. त्यामुळे  मोजक्याच लोकांच्या उपस्थितीत रामजन्म सोहळा साजरा झाल्याची माहिती श्री रामजी संस्थानचे विश्वस्त भरत तुळशीबागवाले यांनी ’लोकमत’ ला दिली.

दरम्यान, उपनगरांमध्यील राममंदिरांमध्ये रामजन्म सोहळा झाला. मंदिरांना फुलांची आकर्षक सजावट करण्यात आली होती. मंदिराबाहेरची मोहक रंगावली लक्ष वेधून घेत होती. मात्र पुण्यातील अन्य राम मंदिरांमध्येही रामनवमीचे कोणतेही कार्यक्रम झाले नाहीत. एकत्र येणे शक्य नसल्याने काही धार्मिक संस्थांनी ऑनलाईन कीर्तन आणि प्रवचनाचे कार्यक्रम आयोजित केल्याचे पाहायला मिळाले.