पुणे-सोलापूर महामार्गावर व्यापाऱ्याच्या पत्नीचा अज्ञात वाहनाच्या धडकेने जागीच मृत्यू

हा अपघात पहाटे ६ वाजेदरम्यान पुणे-सोलापूर महामार्गाच्या सेवा रस्त्यावर यवत येथे घडला. शुभांगी राजेंद्र महामुनी (वय ५० ) असे अपघातात मृत्युमुखी पडलेल्या महिलेचे नाव आहे...

यवत (पुणे) : यवत येथील व्यापाऱ्याची पत्नी पहाटे चालण्यासाठी गेली असताना अज्ञात वाहनाच्या धडकेने जागीच मृत्यू झाला. हा अपघात पहाटे ६ वाजेदरम्यान पुणे-सोलापूर महामार्गाच्या सेवा रस्त्यावर यवत येथे घडला. शुभांगी राजेंद्र महामुनी (वय ५० ) असे अपघातात मृत्युमुखी पडलेल्या महिलेचे नाव आहे.

यवत येथील आदर्श क्लॅथ सेंटरचे मालक राजेंद्र महामुनी व त्यांची पत्नी शुभांगी हे पहाटे व्यायामासाठी गेले होते. पुणे-सोलापूर महामार्गाच्या सेवा रस्त्यावरून घरी परत जात असताना शुभांगी यांना अज्ञात वाहनाने धडक दिल्याने त्यांना डोक्याला हाता पायाला गंभीर मार लागून मोठा रक्तस्राव होऊन जागीच मृत्यू झाला.

पती राजेंद्र व शुभांगी यांच्यात चालताना काही अंतर असल्याने राजेंद्र यांना घरी आल्यानंतर पत्नी आलीच नसल्याचे समजले व नंतर अपघात झाल्याचे कळले. दरम्यान, कोणत्या वाहनाने धडक दिली हे मात्र समजू शकले नाही. दुपारपर्यंत मुख्य बाजारपेठ बंद होती.