कल्याणीनगर मेट्रो स्थानकाच्या कामानिमित्त वाहतूक बदल

पुणे : कल्याणीनगर येथील मेट्रो स्थानकाच्या कामानिमित्त पुढील तीन महिने वाहतूक व्यवस्थेत बदल करण्यात येणार आहे. या भागातील वाहतूक पर्यायी मार्गाने वळविण्यात येणार असून, हे वाहतूक बदल ९ ऑक्टोबरपर्यंत कायम राहणार आहेत.

कोरेगाव पार्ककडून बिशप स्कूल कल्याणीनगरकडे जाणारी वाहतूक एनएम चव्हाण चौक येथे बंद करण्यात येणार आहे. बिशप स्कूलकडून कोरेगाव पार्ककडे जाणारी वाहतूक अ‍ॅडलॅब चौक येथे बंद करण्यात येणार आहे. या भागातील वाहतूक बिशप स्कूल कल्याणीनगरकडून गोल्ड अ‍ॅडलॅब चौकातून उजवीकडे वळवून ती कल्याणीनगर गल्ली क्रमांक सात मार्गाने वळविण्यात येणार आहे. कोरेगाव पार्क एबीसी फार्म चौकाकडून बिशप स्कूल कल्याणीनगरकडे वाहतूक चव्हाण चौकातून डावीकडे वळवून कल्याणीनगर गल्ली क्रमांक आठ मार्गाने उजवीकडे गोल्ड अॅडलॅब चौकाकडे वळविण्यात येणार आहे, असे वाहतूक शाखेचे पोलीस उपायुक्त राहुल श्रीरामे यांनी कळविले आहे.