बैलगाडीला टँकरची धडक ; आईसह चिमुकलीचा मृत्यू

पुणे-सोलापूर राष्ट्रीय महामार्गावर ऊस वाहतूक करणाऱ्या बैलगाडीला टँकरने जोरदार धडक दिली. या अपघातात बैलगाडीतील आई व तिच्या लहान बाळाचा जागीच मृत्यू झाला, तर दोघे जण जखमी झाले.

वरवंड : पुणे-सोलापूर राष्ट्रीय महामार्गावर ऊस वाहतूक करणाऱ्या बैलगाडीला टँकरने जोरदार धडक दिली. या अपघातात बैलगाडीतील आई व तिच्या लहान बाळाचा जागीच मृत्यू झाला, तर दोघे जण जखमी झाले. ही घटना शनिवारी पहाटे घडली. जयश्री गोरख चव्हाण (वय  ३०) आणि दिव्या गोरख चव्हाण (वय ३ महिने) असे मृत्युमुखी पडलेल्यांची नावे आहेत. 

पोलिसांनी दिलेल्या माहितीनुसार पुणे-सोलापूर राष्ट्रीय महामार्गावर वरवंड-चौफुला शिवेवर ऊ सवाहतूक  करणारी बैलगाडी ऊसतोडणी करण्यासाठी जात  होती.  या वेळी विरुद्ध बाजूने भरधाव टँकर आला. टँकरने या बैलगाडीला जोरदार धडक दिली. यामुळे  बैलगाडीमधील जयश्री चव्हाण आणि तिची ३ महिन्यांची चिमुकली दिव्या चव्हाण या दोघींचा जागीच मृत्यू झाला. तर गोरख चव्हाण व वेडू चव्हाण हे गंभीर जखमी झाले आहेत. हा अपघात सकाळी ५च्या  सुमारास झाला. मात्र पोलीस घटनास्थळी उशिरा दाखल झाल्याने पोलिसांबाबत नाराजी व्यक्त केली जात होती. अपघाताच्या ठिकाणापासून वाहतूक पोलीस १ कि.मी. अंतरावर असूनही ते उशिरा दाखल झाले. टँकरचालक संजयकुमार उदीतकुमार मंडल याला नागरिकांनी पकडून  पोलिसांच्या ताब्यात देण्यात आले आहे.