जिल्ह्यातील वीस धरणे शंभर टक्के भरली

लोकमत न्यूज नेटवर्क

पुणे : पुणे जिल्ह्यातील धरण क्षेत्रात जवळपास महिनाभर पावसाने पाठ फिरवली होती. मागील आठवडाभरापासून पुन्हा पावसाने दमदार हजेरी लावल्याने प्रमुख २६ धरणांतील पाणीसाठ्यात झपाट्याने वाढ झाली आहे. विशेषत: मुठा खोरे (खडकवासला प्रकल्प), नीरा खोरे शंभर टक्के भरले आहे. कुकडी प्रकल्पातील धरणांत ७६.६९ टक्के पाणीसाठा जमा झाला आहे.

पुणे शहर आणि हवेली, दौंड, बारामती आणि इंदापूरसाठी महत्त्वाचे असलेल्या खडकवासला प्रकल्पात (मुठा खोरे) ९९.८४ टक्के (२९.११ टीएमसी) पाणीसाठा जमा झाला आहे. आतापर्यंत जिल्ह्यातील २६ पैकी २० धरणे शंभर टक्के भरली आहेत. त्याचबरोबर नीरा खोऱ्यात देखील १०० टक्के पाणीसाठा जमा झाला आहे, तर नाझरे धरणांत २६.३५ टक्के पाणी जमा झाले आहे.

पुणे जिल्ह्यातील जुन्नर, आंबेगाव, शिरूर तसेच खेड तालुक्याच्या काही भागासह अहमदनगर जिल्ह्यातील पारनेर, श्रीगोंदा या तालुक्यातील शेतीसाठी कुकडी प्रकल्पातील आवर्तन अत्यंत उपयुक्त असते. कुकडीच्या पाण्यामुळे या तालुक्यातील शेतकरी विविध पिके घेत असतो. मात्र, जवळपास दीड महिना कुकडी प्रकल्प क्षेत्रात पावसाने दडी मारली होती. त्यामुळे शेतकरी काहीसा चिंताग्रस्त झाला होता. मात्र, मागील आठवड्याभरापासून पावसाने दमदार हजेरी लावल्याने कुकडी प्रकल्पातील पाणीसाठा २० टक्क्यांनी वाढला आहे. ५६ टक्क्यांवरून आता ७६.६९ टक्के पाणीसाठा जमा झाला आहे.

चौकट

‘उजनी’तील साठा पोहोचला ८३ टक्क्यांवर

पुणे, सोलापूर, अहमदनगरचा काही भाग, तर उस्मानाबाद जिल्ह्याच्या काही भागासाठी महत्त्वाचे असलेल्या उजनी धरणात बुधवारी (दि. २२) सकाळी ८ वाजेपर्यंत ८३.१० टक्के (४४.५२ टीएमसी) पाणीसाठा जमा झाला आहे. मागील आठवड्यापासून मुठा आणि भीमा खोऱ्यात पावसाने हजेरी लावल्याने उजनी धरणात पुन्हा पाणीसाठा येण्यास सुरुवात झाली आहे. ८ ऑगस्टला ६१ टक्के पाणीसाठा होता. आता तो ८३.१० टक्क्यांवर पोहोचला आहे.

चौकट

जिल्ह्यातील प्रमुख धरणांतील उपयुक्त पाणीसाठ्याची माहिती

धरण - प्रकल्प साठा (टीएमसी) - सध्याचा साठा --टक्केवारी

टेमघर ३.७१ ३.७१ १००

वरसगाव १२.८२ १२.८२ १००

पानशेत १०.६५ १०.६५ १००

खडकवासला १.९७ १.९३ ९७.६०

पवना ८.५१ ८.५१ १००

कासारसाई ०.५७ ०.५६ ९९.५६

मुळशी २०.१६ १९.३९ ९६.१७

कळमोडी १.५१ १.५१ १००

चासकमान ७.५८ ७.५८ १००

भामा आसखेड ७.६७ ७.६७ १००

आंध्रा २.९२ २.९२ १००

वडीवळे १.०७ १.०७ १००

शेटफळ ०.६० ०.०८ १३.२८

गुंजवणी ३.६९ ३.६९ १००

भाटघर २३.५० २३.५० १००

नीरा देवघर ११.७३ ११.७३ १००

वीर ९.४१ ९.४१ १००

नाझरे ०.५९ ०.१५ २६.३५

पिंपळगाव जोगे ३.८९ २.२६ ५८.१३

माणिकडोह १०.१७ ६.०१ ५९.०६

येडगाव २.८० १.५२ ७८.४४

वडज १.१७ १.१७ १००

डिंभे १२.४९ १२.५० १००

चिल्हेवाडी ०.९६ ०.८० १००

घोड ५.४७ २.८४ ५८.२७

विसापूर ०.९० ०.०७ ७.८५

उजनी ५३.५७ ४४.५२ ८३.१०