हप्ता मागणा-या तोतया महिला पत्रकारासह दोघांना अटक

पुणे : पत्रकार असल्याचे ओळखपत्र गळ्यात घालून आम्ही गुन्हेविषयक बातमीदार असल्याचे सांगून परमिट रूमचालकाकडे हप्ता मागणा-या तोतया महिला पत्रकारासह दोघांना पोलिसांनी सापळा रचून अटक केली.

हाजलिना प्रमोद जयस्वाल (वय ३५, रा. ताडीवाला रोड) आणि सतपाल सिंग अमरसिंग बग्गा (वय ५७, रा. वाघोली) अशी अटक केलेल्यांची नावे आहेत. दोघांवर खंडणीचा गुन्हा दाखल करण्यात आला आहे.

याप्रकरणी एका ३० वर्षांच्या परमिट रूमचालकाने खडक पोलिसांकडे फिर्याद दिली आहे. त्यांचे सेवन लव्हज चौक येथे इंप्रेस सेव्हन लव्हज परमिट रूम आहे. त्यांच्याकडे हाजलिना जयस्वाल व सतपाल बग्गा हे शनिवारी आले होते. त्यांनी गळ्यात सीसीटी क्राईम चेक टाईम्स या नावाच्या वृत्तसंस्थेची पत्रकार असल्याचे ओळखपत्र घातले होते. त्यांनी आम्ही गुन्हे बातमीदार असून तुम्ही बेकायदा दारू विक्री करीत आहात. लोकांना परमिटरूममध्ये मद्यपानाची परवानगी देता. तुमच्यावर कारवाई करण्यात येणार आहे. तुमच्या मालकांना आमचे पथक बोलवत आहे, असे सांगितले. त्यानंतर ते एक हजार रुपये घेऊन निघून गेले. केस करायची नसेल तर जादा ५ हजार रुपये द्यावे लागतील, असे त्यांनी फोन करून सांगितले. त्यानंतर फिर्यादी यांनी खडक पोलिसांना फोन करून याची माहिती दिली. तेव्हा पोलिसांच्या सूचनेनुसार फिर्यादीने त्यांना पैसे देण्याची तयारी दर्शविली. शनिवारी दुपारी ते पैसे घेण्यासाठी आले असताना पोलिसांनी दोघांना पकडले.

याबाबत सहायक पोलीस निरीक्षक चंद्रकांत गोसावी यांनी सांगितले की, हे दोघांकडील ओळखपत्र बनावट असल्याचे दिसत आहे. ते आपण प्रेस सीसीटी क्राईम चेक टाईम्सचे पत्रकार असून ते दिल्लीत नोंदणीकृत असल्याचे सांगतात. याबाबत खात्री करण्यात येत आहे.