सॅलिसबरी पार्कमध्ये दोन मोटारी जाळल्या

गुलटेकडी येथील सॅलिसबरी पार्कमधील संदेश सोसायटीतील दोन मोटारी अज्ञात व्यक्तींनी पेटवून दिल्या. याप्रकरणी मार्केट यार्ड

पुणे : गुलटेकडी येथील सॅलिसबरी पार्कमधील संदेश सोसायटीतील दोन मोटारी अज्ञात व्यक्तींनी पेटवून दिल्या. याप्रकरणी मार्केट यार्ड पोलिसांनी गुन्हा दाखल केला असून, दोन्ही मोटारींचे मिळून ५ लाख ३० हजार रुपयांचे नुकसान झाले आहे.
अक्षय गुप्ते (वय ३०, रा. संदेश सोसायटी, मार्केटयार्ड) यांनी फिर्याद दिली आहे. गुप्ते आणि त्यांच्या काकांचा संदेश सोसायटीमध्ये बंगला आहे. ते खासगी कंपनीमध्ये नोकरीस असून, शुक्रवारी रात्री त्यांनी बंगल्याच्या पार्किंगमध्ये मोटार लावली. शेजारीच त्यांच्या काकांचीही मोटार होती. शनिवारी मध्यरात्री अचानक पार्किंगमधून धूर येऊ लागला. धुरामुळे जाग आलेल्या गुप्ते यांनी पार्किंगमध्ये पाहिले असता मोटारीने पेट घेतल्याचे दिसले. त्यांनी पाण्याचा मारा करीत आग विझवण्याचा प्रयत्न केला. मात्र, त्यांच्या मोटारीचा पाठीमागील भाग जळून खाक झाला. तर शेजारी असलेल्या मोटारीचेही नुकसान झाले. कोणीतरी अज्ञात व्यक्तीने ज्वलनशील पदार्थ टाकून या मोटारी पेटवल्या असल्याचा संशय पोलिसांनी व्यक्त केला आहे. पुढील तपास उपनिरीक्षक पी. पी. ढवण करत आहेत.