सणसर येथे भीषण अपघात, दोन जण जागीच ठार

लोकमत न्यूज नेटवर्क

सणसर : दगडाने भरलेल्या ट्रॅक्टरची आणि दुचाकीची धडकेत दुचाकीवरील दोघांचा जागीच मृत्यू झाला, तर एक जण जखमी झाला आहे. ही घटना सणसर (ता. इंदापूर) येथील पाटबंधारे खात्याच्या वसाहतीजवळ सोमवारी घडली.

मीराबाई कैलास अष्टेकर (वय ४५ रा.अशोकनगर, सणसर), प्रदीप कुमार फडतरे (वय २४ रा.अशोकनगर, सणसर) अशी अपघातात मृत्यू झालेल्यांची नावे आहेत, तर ओंकार कैलास अष्टेकर हा जखमी झाला आहे. पोलिसांनी दिलेल्या माहितीनुसार, दगडाने भरलेला ट्रॅक्टर हा सणसरकडे जात होता. पाटबंधारे वसाहतीजवळ (इ.बंगला) मोटारसायकले ट्रॅक्टरला धडक दिली. यामुळे मीराबाई अष्टेकर व प्रदीप फडतरे हे दोघेही ट्रॅक्टरच्या चाकाखाली आल्याने त्यांचा जागीच मृत्यू झाला. घटनेनंतर या ट्रॅक्टरचा चालक पळून गेला आहे. अपघातस्थळी नागरिक व पोलिसांनी त्वरित मदत कार्य करून जखमींना दवाखान्यात पाठविण्यात आले. पोलीस उपनिरीक्षक नितीन लकडे, सहायक फौजदार प्रभाकर बनकर, पोलीस नाईक गुलाबराव पाटील यांनी अपघातग्रस्त ट्रॅक्टर ताब्यात घेऊन वाहतूक सुरळीत केली. दरम्यान, या अपघातामुळे अशोकनगर सणसर येथे शोककळा पसरली आहे.