प्रेमविवाहानंतरही पोलिसाच्या बाहेर दोन-तीन भानगडी?

लोकमत न्यूज नेटवर्क

पुणे : प्रेमविवाहानंतर आणखी दोन ते तीन महिलांशी अनैतिक संबंध ठेवून मारहाण करणाऱ्या पोलीस पतीच्या छळाला कंटाळून पत्नीने आत्महत्येचा प्रयत्न केला. तीन मुले झाल्यानंतरही पतीने वाऱ्यावर सोडल्याची पत्नीची भावना होती. कौटुंबिक हिंसाचार प्रकरणी खडक पोलिसांनी एका पोलीस कर्मचाऱ्यासह तिघांविरुद्ध गुन्हा दाखल केला आहे.

पोलीस नाईक राजकुमार तात्याबा शिंदे (वय ४२, रा. हडपसर) असे गुन्हा दाखल झालेल्याचे नाव आहे. याप्रकरणी त्याच्या पत्नीने फिर्याद दिली आहे. हा प्रकार फलटण, स्वारगेट पोलीस वसाहतीत २००८ ते २१ सप्टेंबर २०२१ दरम्यान घडला.

फिर्यादी व आरोपी राजकुमार शिंदे यांचे लग्नापूर्वी प्रेमसंबंध होते. लग्नानंतरही आरोपीचे बाहेरील दोन ते तीन महिलांसोबत अनैतिक संबंध असल्याचे फिर्यादी यांना समजले. त्याची विचारपूस केल्यावर त्याने फिर्यादीने शिवीगाळ करून मारहाण केली. त्यानंतर राजकुमार शिंदे राहत्या घरातील सर्व संसारोपयोगी साहित्य तसेच दोन मुली व लहान मुलगा यांना घेऊन कोठेतरी निघून गेला. फिर्यादी यांना एकटे सोडून दिले. फिर्यादी याने आरोपीला वारंवार फोन केला तरी त्याने उचलला नाही. त्यामुळे मानसिक तणावात फिर्यादी यांनी स्वारगेट पोलीस वसाहतीतील राहत्या घरी २१ सप्टेंबर रोजी घरातील फरशी साफ करण्याचे फिनेल पिऊन आत्महत्या करण्याचा प्रयत्न केला. सध्या फिर्यादीवर रुग्णालयात उपचार करण्यात येत आहेत. खडक पोलिसांनी गुन्हा दाखल केला असून सहायक पोलीस निरीक्षक म्हस्के तपास करीत आहेत.