सर्पदंशाने दोन वर्षीय चिमुकलीचा मृत्यू; शिरूर तालुक्यातील घटना

घराच्या अंगणात खेळत असताना सापाने मुलीला डाव्या पायाला दंश केला

निमोणे: येथे मजुरी करण्यासाठी आलेल्या बिहार येथील कुटुंबातील दोन वर्षीय चिमुकलीचा सर्पदंशाने मृत्यू झाल्याची घटना घडली. जान्हवी कुमारी विमलकुमार राम असे या चिमुकलीचे नाव आहे. याबाबत मुलीच्या वडिलांनी शिरुर पोलिस स्टेशन येथे माहिती दिली आहे.

याबाबत शिरूर पोलिसांनी दिलेल्या माहितीनुसार गुरुवारी (दि. २९) सायंकाळी ६:३० च्या सुमारास फिर्यादी विमलकुमार बहादूर राम (वय २७, सध्या रा. काळेवस्ती रोड, निमोणे, ता. शिरुर, जि. पुणे, मूळ रा. दिघली, हसनपूर वाॅर्ड ३३ किसनगंज, बिहार) हे त्यांची पत्नी व मुलगी असे घरी असताना मुलगी जान्हवी कुमारी ही घराच्या बाहेर अंगणात मांजरासोबत खेळत होती. त्यावेळी अचानक मुलीचा रडण्याचा आवाज आल्याने विमलकुमार राम आणि त्यांची पत्नी दोघेही घरातून बाहेर आले असता, सापाने मुलीला डाव्या पायाला दंश करताना त्यांनी बघितले. त्यानंतर मुलीला उपचारासाठी शिरूर येथील ग्रामीण रुग्णालयात आणले. मात्र, डॉक्टरांनी जान्हवीचा मृत्यू झाल्याचे घोषित केले. शिरूर पोलिस स्टेशनचे पोलिस निरीक्षक ज्योतिराम गुंजवटे यांच्या मार्गदर्शनाखाली पोलिस नाईक विनोद मोरे या घटनेचा अधिक तपास करत आहेत.