उद्या सकाळी ९ पर्यंतचा प्रशासनाला 'अल्टिमेटम'; नाहीतर ससूनमधील निवासी डॉक्टर जाणार संपावर

प्रशासनाचा ससूनमधील बेड्स वाढविण्याचा निर्णय फक्त जनतेला दाखविण्यासाठी.....

पुणे : पुण्यातील कोरोना रुग्ण वाढत असताना प्रशासन यंत्रणा ससून रुग्णालयातील बेड्स वाढविण्याचा निर्णय घेतला आहे.मात्र त्यासोबत मनुष्यबळ, व्हेंटिलेटर, ऑक्सिजन,वैद्यकीय उपचार यंत्रणा, कर्मचारी वर्ग न देता फक्त जनतेला दाखविण्यासाठी हा निर्णय घेत आहे. त्याच पार्श्वभूमीवर प्रशासनाने आमच्या मागण्यांचा विचार करत उद्या सकाळी ९ पर्यंत सकारात्मक निर्णय घेतला नाही तर शनिवारपासून काम बंद करत संपावर जाण्याचा इशारा ससूनमधील निवासी डॉक्टरांची संघटना असलेल्या 'मार्ड' ने दिला आहे. 

पुण्यात कोरोनाबाधितांना उपचारासाठी बेड्स उपलब्ध होत नसल्याच्या पार्श्वभूमीवर प्रशासनाकडून खासगी रुग्णालयांसह सरकारी रुग्णलयातील बेड्स वाढविण्यावर भर दिला जात आहे. त्याच धर्तीवर ससूनमधील बेड्स वाढवण्याचा निर्णय प्रशासनानेे घेतला आहे. मात्र त्याला आता 'मार्ड'तर्फे विरोध करण्यात येत आहे.मात्र, काम बंदचा इशारा देतानाच कोरोना वॉर्डसह तातडीच्या कोणत्याही सेवेवर परिणाम होऊ दिला जाणार नाही, असे मार्डतर्फे सांगण्यात आले आहे.  

मार्डचे काही निवासी व प्रशिक्षणार्थी डॉक्टर म्हणाले, कोरोनाची शहरातील परिस्थिती दिवसेंदिवस गंभीर होत चालली आहे. बेड्स उपलब्ध करून देणे गरजेचे देखील आहे. ही परिस्थिती आम्हाला समजत आहे. मात्र, प्रशासनाने बेड्स वाढविण्यासोबतच पुरेसे मनुष्यबळ, व्हेंटिलेटर, ऑक्सिजन, वैद्यकीय कर्मचारी वर्ग सह इतर आवश्यक सुविधांचा पुरवठा आधी करावा. त्यानंतर बेड्सची संख्या वाढवावी. प्रशासन या संबंधी गंभीर नसून फक्त जनतेला दाखविण्यासाठी हा निर्णय घेत आहे . 

मार्डचे सचिव ज्ञानेश्वर जामकर म्हणाले, गेल्या वर्षभरापासून आम्ही रुग्णसेवेचे काम करीत आहोत. सध्या ससूनमध्ये ५५० कोरोना आणि ४५० इतर रुग्ण आहेत. मात्र, निवासी डॉक्टरांची संख्या केवळ ४५० आहे. आणखी ३०० बेड वाढविले तर किमान १०० डॉक्टरांची गरज भासणार आहे. तरच रुग्णांना चांगली सेवा देणे शक्य होणार आहे. जिल्हाधिकाऱ्यांसोबत बैठक झाली. त्यांच्यापुढेही आम्ही आमच्या मागण्या मांडल्या आहेत. आमची मनुष्यबळ वाढविण्याची मागणी आहे. त्यासाठी सकारात्मक प्रतिसाद मिळाला नाही तर शनिवार (दि.१७) पासून तातडीच्या नसलेल्या सेवा बंद करण्याचा निर्णय घेण्यात आला आला आहे. कोरोना वॉॅर्ड, कॅॅज्युलिटी, आयसीयू, लेबर रूम, सर्व प्रकारच्या तातडीच्या शस्त्रक्रिया वगळता इतर सेवा देणे बंद ठेवण्यात येणार आहे. 

दुसऱ्या लाटेची कल्पना जर डिसेंबर 2020 लाच आली असताना शासनाकडून कोणतीही पूर्वतयारी केली गेली नाही असा सवाल उपस्थित करत विद्यार्थी म्हणाले, मनुष्यबळाशिवाय बेड वाढवल्यामुळे पेशंटची उपचार व्यवस्थापन यंत्रणा पूर्णपणे कोलमडून जाईल. तसेच बेड तर तयार करण्यात येतील पण त्यासाठी आवश्यक असणार मनुष्यबळ,साधनसामुग्री प्रशासनाकडे आहेत का? कोरोना काळात कर्तव्य बजावणाऱ्या डॉक्टर्ससाठी क्वारंटाईन, आयसोलेशनची सुविधा नाही, त्यामुळे एका महिन्यात आमचे ८० निवासी डॉक्टर्स कोरोनाबाधित झाले. आम्ही दीड महिन्यापासून प्रशासनाला यावर आवश्यक उपाययोजनांसाठी विनंती करत असून त्यावर पावले आतापर्यंत प्रशासनाकडून उचलली गेलेली नाही.