अनधिकृत फ्लेक्समुळे वाहतुकीस अडथळा

थेऊर : फाटा येथील थेऊरकडे जाणाऱ्या रस्त्यावर असणाऱ्या डिव्हायडरवर लावण्यात आलेल्या फ्लेक्समुळे तेथील वाहतुकीस अडथळा होत आहे.

श्रीक्षेत्र थेऊर अष्टविनायकपैकी एक असलेले क्षेत्र आहे. तसेच हा रस्ता सोलापूर महामार्ग व नगर महामार्ग यांना जोडणारा दुवा असल्याने खूप मोठ्या प्रमाणात या रस्त्यावर रहदारी असते. थेऊरकडे जाणाऱ्या या रस्त्याची अवस्था आधीच बिकट आहे. त्यामुळे अनेक अपघात या मार्गावर झालेले आहेत. त्यातच महामार्गावर येताच या अनधिकृत फ्लेक्समुळे पुण्याच्या दिशेने येणाऱ्या गाड्या दिसत नसल्याने रस्ता ओलांडण्यासाठी रस्त्याच्या मधोमध येऊन थांबावे लागत असून त्यामुळे खूप मोठ्या प्रमाणात ट्रॅफिक जाम होत आहे. विशेष म्हणजे लोणी काळभोरचे ट्रॅफिक पोलीस या चौकात (गाड्या अडविण्यासाठी) उभे असतात. परंतु ज्यामुळे अपघात होत आहेत असे जाहिरात फलक त्यांना दिसत नसल्याची चर्चा लोकांमध्ये आहे. अनेक कर्मचारी त्या चौकात न थांबता थेऊर रस्त्याला जाऊन कार्यवाही करत असल्याचे दिसत आहे. परंतु सर्वसामान्यांना त्रास होणाऱ्या अनधिकृत फ्लेक्सवर मात्र प्रशासनाचे दुर्लक्ष झालेले दिसत आहे.