वैफल्यग्रस्त जगतापांचे बिनबुडाचे आरोप

पुणे : “ॲॅमेनिटी स्पेसच्या विषयावरून ‘राष्ट्रवादी’त माजलेले रणकंदन, स्थायी समिती सदस्यांसह पक्षादेश धुडकावणारे नगरसेवक आणि महापालिकेच्या निवडणुका जाहीर होण्यापूर्वीच दिसू लागलेला पराभव, यामुळे राष्ट्रवादी कॉंग्रेसचे शहराध्यक्ष प्रशांत जगताप वैफल्यग्रस्त झाले आहेत. आपले अपयश लपविण्यासाठी बेछुट आणि बिनबुडाचे आरोप करत आहेत,” अशी टीका भाजपचे प्रवक्ते संदीप खर्डेकर यांनी केली आहे.

भाजप प्रदेशाध्यक्ष चंद्रकांत पाटील यांच्या नेतृत्वाखाली भाजपाने पुण्यात कामांचा धडाका लावला असून २०१७ च्या निवडणुकीत दिलेली सर्व आश्वासने पूर्ण करत आणली आहेत. येत्या मनपा निवडणुकीत पुणेकर पुन्हा एकदा भाजपला पसंती देतील हे लक्षात आल्याने जगताप आपले अस्तित्व टिकविण्यासाठी चंद्रकांत पाटील यांना लक्ष्य करत असल्याचे खर्डेकर म्हणाले.

मात्र या प्रयत्नात आपलेच हसू होत आहे हे त्यांच्या लक्षात येत नसावे. राजकीय सभ्यतेनुसार त्यांनी त्यांच्या बरोबरीच्या नेत्यांवर टीका केली तर समजून घेता येईल; पण थेट भाजप प्रदेशाध्यक्षांवर आरोप करताना त्यांना सभ्यतेचे भान राहिलेले नाही. जगतापांचा सारा खटाटोप प्रसिद्धीसाठी असून मोठ्या नेत्यांवर बोलले की वारेमाप प्रसिद्धी मिळते आणि आपले अपयशही झाकता येते असा त्यांचा गैरसमज आहे, असे खर्डेकर यांनी म्हटले आहे.