तीन नराधमांकडून 8 वर्षीय मुलावर २ महिन्यांपासून अनैसर्गिक अत्याचार; पुण्यातील संतापजनक घटना

संपूर्ण घटनेबाबत कोणाला काही सांगितल्यास मारून टाकण्याची धमकीही दिली

पुणे/किरण शिंदे : घराशेजारी राहणाऱ्या एका आठ वर्षीय चिमुरड्यावर तीन नराधमांनी मिळून सलग दोन महिने अनैसर्गिक अत्याचार केल्याचा प्रकार उघडकीस आला आहे. सर्वप्रथम अश्लील व्हिडिओ दाखवून त्याच्यासोबत अनैसर्गिक कृत्य केले. त्यानंतर हा सर्व प्रकार घरी सांगण्याची धमकी देत तब्बल दोन महिने त्याच्यावर अनैसर्गिक अत्याचार करण्यात आले. दत्तवाडी पोलीस ठाण्यात या प्रकरणी गुन्हा दाखल करण्यात आला असून अत्याचार करणाऱ्या तीन तरुणांना अटक करण्यात आली आहे. 

संतोष उर्फ पक्या प्रकाश शिंदे (वय 21), हेमंत उर्फ हेम्या महेश माळवे (वय 19) आणि किरण सुरेश सावंत (वय 25) अशी अटक करण्यात आलेल्या आरोपींची नावे आहेत. त्यांच्या विरोधात भादवी 376 (ड), 377, 506 (2), पोक्सो क 3 (ए) यासह इतर कलमानुसार गुन्हा दाखल करण्यात आला आहे. पीडित मुलाच्या वडिलांनी याप्रकरणी तक्रार दिली आहे. 

पोलिसांनी दिलेल्या माहितीनुसार, आरोपी आणि फिर्यादी हे एकाच भागात राहण्यासाठी आहे. फिर्यादी यांच्या आठ वर्षीय मुलाला आरोपी संतोष उर्फ पक्या याने विमलची पुडी आणण्यासाठी पाठवले. त्यानंतर त्याला पर्वती दर्शन येथील आपल्या घरी नेले. त्या ठिकाणी आधीच असलेल्या आरोपी हेमंत उर्फ हेम्या याने या मुलाला अश्लील व्हिडिओ दाखवला आणि संतोष उर्फ पक्या याने त्याच्यासोबत अनैसर्गिक कृत्य केले. आरोपी किरण सावंत याने हा सर्व प्रकार मोबाईलवर रेकॉर्ड केला. त्यानंतर हा व्हिडिओ त्याच्या नातेवाईकांना दाखवण्याची धमकी देत सलग दोन महिने त्याच्यावर अनैसर्गिक अत्याचार केले. 

या संपूर्ण घटनेबाबत कोणाला काही सांगितल्यास "चाकू खुपसून तुला मारून टाकीन. त्यानंतर पेटीमध्ये टाकून लॉक करून एका खड्ड्यात टाकीन. तुझ्या आई-वडिलांनी विचारले कुठे गेला तर आम्हाला माहित नाही असे सांगेन" अशी धमकी देखील दिल्याचे आरोपींनी उघड झाले आहे. दत्तवाडी पोलिसांनी याप्रकरणी गुन्हा दाखल करून आरोपीला अटक केली.