Video: चंद्रकांत पाटील येताच वाजवलं 'राष्ट्रवादी पुन्हा...' गाणं; भलतंच धाडस डीजेला पडलं महागात

पोलिसांनी हे गाणं वाजवणाऱ्या डीजेला ताब्यात घेत त्याच्यावर गुन्हा दाखल केला

पुणे : पुणे शहरातील रास्ता पेठेत दुधभट्टी भागात दरवर्षी सगर कार्यक्रमाचे आयोजन केले जाते. संपूर्ण जिल्ह्यातून या ठिकाणी रेडे आणले जातात. व त्यांना मान दिला जातो. यंदाही कोरोनाच्या दोन वर्षांनंतर दुधभट्टी भागात सगरचे आयोजन करण्यात आले होते. यावेळी पालकमंत्री चंद्रकांत पाटील पुण्यात असल्याने त्यांनी याठिकाणी भेट दिली. तेव्हा पाटील येताच मोठ्या आवाजात स्पीकरवर गाणी लावण्यात आली होती. एवढच करून डीजेवाला थांबला नाही. तर त्याने चक्क पाटील यांच्या उपस्थितीत ''राष्ट्रवादी पुन्हा....'' हे गाणं वाजवण्याच धाडस केलं आहे. याप्रकरणी तिथे गाणं वाजवणाऱ्या डीजेला ताब्यात घेतले आहे. 

चंद्रकांत पाटील येताच वाजवलं 'राष्ट्रवादी पुन्हा' गाणं; भलतंच धाडस डीजेला पडलं महागात #Pune#Diwali#chandrakantpatilpic.twitter.com/ZShwT5z5j7

— Lokmat (@lokmat) October 28, 2022

दिवाळीनिमित्ताने शुभेच्छा देण्यासाठी मंत्री पुणे दौऱ्यावर येत आहेत. त्यापमाणेच पुण्याचे पालकमंत्री दिवाळीनिमित्त आयोजित कार्यक्रमांना भेटी देऊन शुभेच्छा देत होते. त्याच वेळी रास्ता पेठेत सगर कार्यक्रमाला भेट देण्यासाठी आले होते. यावेळी पाटील कार्यक्रमस्थळी दाखल होताच डीजेने भलतंच धाडस केलं आहे. त्याने त्यांच्यासमोर "राष्ट्रवादी पुन्हा..." ही गाणं मोठ्या आवाजात स्पीकरवर लावले. हे धाडस डीजेला चांगलाच महागात पडलं असून त्याला पोलिसांनी त्याच क्षणी ताब्यात घेतले आहे. पाटील कार्यक्रमस्थळी येताच तिथे उपस्थित असलेल्या डीजेने अचानक राष्ट्रवादी काँग्रेसचं प्रचार गीत लावलं. यानंतर उपस्थितांमध्ये थोडासा गोंधळ उडाल्याचे दिसून आले आहे. पोलिसांनी हे गाणं वाजवणाऱ्या डीजेला ताब्यात घेत त्याच्यावर गुन्हा दाखल केला आहे. यावेळी पोलिसांनी, त्याने साऊंड सिस्टीम उभारण्यासाठी परवानगी घेतलेली नव्हती असं कारण दिलं आहे.