विजय शिवतारेंच्या मुलीची भावनिक पोस्ट व्हायरल, भावांवर आरोप, शिवतारे यांच्या पत्नीचाही व्हिडीओद्वारे खुलासा

जेजुरी: पुरंदरचे सेनेचे माजी मंत्री विजय शिवतारे यांच्या मुलीने आज पहाटे ३ वाजता मुंबईतील ब्रिच कॅण्डी रुग्णालयातून एक धक्कादायक पोस्ट फेसबुकवर टाकली आहे. या पोस्टमधून शिवतारेंच्या घरातील कलह समोर आला. तिने आपल्या भावांवर गंभीर आरोप केले आहेत. तर मुलीच्या पोस्टनंतर शिवतारेंच्या पत्नीनेही व्हिडीओ पोस्टद्वारे मुलीचे आरोप खोडून काढले आहेत. यामुळे पुरंदर तालुक्यात मात्र मोठी खळबळ माजली आहे.

पुरंदर मतदार संघाचे दोन वेळा नेतृत्व करणारे राज्यमंत्री विजय शिवतारे यांना आज पहाटे हृदयविकाराचा झटका आल्याने त्यांना त्यांची मुलगी डॉ. ममता शिवदीप लांडे यांनी फेसबुकवरून एक भावनिक पोस्ट टाकली आहे. त्यात त्यांनी भाऊ विनय आणि विनस हे दोघेजण संपत्तीसाठी आपल्या वडिलांचा मानसिक छळ करीत आहेत. संपत्तीच्या हव्यासापोटी भाऊ विनय हा कौटुंबिक वादातून वडिलांची बदनामी करीत आहे. गेल्या दीड वर्षापासून वडील विजय शिवतारे दिवसाआड डायलिसिसला जात आहेत. या काळात माझ्या दोन्ही भावांनी त्यांची साधी विचारपूस ही केली नाही. उलट त्यांच्या आजारपणाचा फायदा घेत त्यांचा मानसिक छळ करीत आहेत. वडिलांची सगळी संपत्ती विनय आणि विनस यांच्या कुटुंबीयांच्या नावाने करून दिलेली आहे. तरी ही जेजुरीतील इथेनॉल प्लांट नावावर करून देण्यासाठी दबाव टाकत आहेत. गेल्या दोन महिन्यांपासून सोशल मीडियाद्वारे बदनामी करून दबाव वाढवण्याचा त्यांचा प्रयत्न आहे. बदनामीच्या धमक्या देऊन मानसिक त्रास देत आहेत. असे आरोप करीत ममता यांनी गेल्या सत्तावीस वर्षांपूर्वी १९९४ साली जे घडले ते सत्य असो अथवा असत्य आज त्या का उकरून काढाव्यात ? वडिलांचा द्वेषच होता तर तो याकाळात का व्यक्त नाही केला. आताच का असे? वडिलांची संपत्ती नावावर करून घेतली पण स्वतःचे स्वकर्तृत्व काय? मृत्यूशय्येवर असताना मुलांनी असे वागणे योग्य आहे का? असे प्रश्न ही सार्वजनिक करून भावनिक पोस्ट लिहिली आहे.

ममता लांडे यांची ही पोस्ट व्हायरल झाल्यानंतर, लगेच शिवतारे यांच्या पत्नी मंदाकिनी शिवतारे यांनी ही व्हिडीओ पोस्टद्वारे आपल्या मुलीने डॉ. ममताने मुलांवर केलेले सर्व आरोप धांदात खोटे आहेत. उलट गेल्या २७ वर्षांपासून पती वेगळे राहत आहेत. पती शिवतारे सुरुवातीचे पाच वर्षे उज्ज्वला बागवे यांच्याशी लग्न करून राहत होते. त्यानंतर आजतागायत ते मीनाक्षी पटेल यांच्यासोबत पवई येथे राहत आहेत. उलट पती विजय शिवतारे यांचा मानसिक छळ होऊ नये असाच आमचा प्रयत्न आहे. अशी पोस्ट केली आहे. सोशल मीडियाद्वारे शिवतारे यांच्या घरातील कलह जगजाहीर झाल्याने पुरंदर तालुक्यातील राजकीय क्षेत्रात मोठी खळबळ माजली आहे. सेनेच्या काही पदाधिकाऱ्यांशी संपर्क साधला असता त्यांनी घरगुती कलह असल्याचे म्हटले आहे. मात्र तो संपुष्टात येईल अशाच प्रतिक्रिया दिल्या आहेत.

ब्रिच कॅण्डी रुग्णालयात उपचार घेत असलेले विजय शिवतारे.