बारागाव मावळ परिसरातील गावांचा संपर्क तुटला

लोकमत न्यूज नेटवर्क

मार्गसनी : किल्ले राजगडकडे जाणाऱ्या साखर रस्त्यावरील पूल पाण्याखाली गेला असल्याने बारागाव मावळ परिसरातील गावांचा संपर्क तुटला आहे. तर धानेप जवळ असलेला फुल देखील पाण्याखाली गेलेला आहे. त्यामुळे परिसरातील आठ ते दहा गावांचा संपर्क तुटलेला आहे.

पुणे आणि रायगड जिल्ह्यांच्या सीमेवरती असणारे कर्नवडी गावाच्या जवळ असलेल्या डोंगराला मागील वर्षी भेगा पडलेल्या होत्या. त्यामुळे या गावास धोका संभवतो म्हणून या गावास पाहणी करण्यासाठी तहसीलदार शिवाजी शिंदे साहाय्यक पोलीस निरीक्षक मनोज पवार गुप्त विभागाचे प्रमुख अभय बर्गे गेले असता कर्नवडी गावाला जोडणाऱ्या दरीमध्ये जास्त पाणी आल्याने त्यांना गावांमध्ये जाता आले नाही. परंतु फोनवर संपर्क केल्यानंतर येथील लोक सुरक्षित असल्याचे तहसीलदार शिवाजी शिंदे यांनी सांगितले. वेल्हे तालुक्यात गेली पाच दिवस पावसाने थैमान घातले आहे. प्रशासनाच्या सतर्कतेमुळे तालुक्यातील वेल्हे, केळद आणि पानशेत घोल मार्ग मोकळा झाला आहे. अतिवृष्टीमुळे जाधववाडी येथे दरड कोसळून रस्ता काही काळ बंद होता. मात्र, तहसीलदार शिवाजी शिंदे, गट विकास अधिकारी विशाल शिंदे, सार्वजनिक बांधकाम विभागाचे संजय सपकाळ, पोलीस निरीक्षक मनोज पवार आदी अधिकाऱ्यांनी घटनेचे गांभीर्य ओळखत भर पावसात दरड रस्त्याच्या बाजुला करत मार्ग मोकळा केला. पानशेत घोल रस्त्यावर ठीकठिकाणी दरडी कोसळल्या होत्या येथील जिल्हा परिषद सदस्य अमोल नलावडे यांनी सतर्कतेने घटनास्थळी जाऊन दरडी बाजूला करण्यासाठी प्रयत्न करत पानशेत आणि घोल मार्गावरील वाहतूक सुरळीत केली. गुंजवणी धरणातून पाणी सोडल्याने कानंदी नदी दुथडी भरून वाहत आहे. तर राजगडाकडे जाणारा साखर रस्त्यावरील पूल पाण्याखाली गेलेला आहे. त्यामुळे परिसरातील गावांचा संपर्क तुटलेला आहे. धानेप जवळ असलेला पूल देखील पाण्याखाली गेलेला आहे. त्यामुळे विहीर, निवी, घिसर, अंत्रोली परिसरातील गावांचा संपर्क तुटला आहे.

फोटो साठी : केळद रस्ता ठिकाणी रस्ता खचलेला आहे तर रस्त्यावरील दरडी कोसळण्याचे प्रमाण वाढलेले आहे.