पुणेकरांवरील पाणी कपातीचे संकट तुर्तास टळले; खडकवासला प्रकल्पात ६ दिवसात वाढले २ टीएमसी पाणी

गेल्या ६ दिवसात खडकवासला धरण प्रकल्पाचा पाणीसाठा ६.५० टीएमसी पाणीसाठा झाला असून या प्रकल्पात आता २२.२९ टक्के पाणीसाठा झाला

पुणे : धरणाच्या पाणलोट क्षेत्रात पाऊस सुरू असल्याने पुणे शहराला पाणी पुरवठा करणाऱ्या खडकवासला धरण प्रकल्पात ६.५० टीएमसी पाणी साठा झाला आहे. त्यामुळे गेल्या सहा दिवसांमध्ये दोन टीएमसी पाणी वाढले आहे.

पुणे शहराला पाणीपुरवठा करणाऱ्या खडकवासला धरण प्रकल्पातील खडकवासला, पानशेत, टेमघर, आणि वरसगाव या चारही धरणातील पाणीसाठा कमी होऊन ३.५० टीएमसी झाला होता. मात्र त्यानंतर खडकवासला धरण साखळीच्या पाणलोट क्षेत्रात पावसाला सुरुवात झालेली आहे. २ जुलै रोजी खडकवासला धरण प्रकल्पात ४.५५ टीएमसी पाणी साठा होता. त्यानंतर पावसाचा जोर वाढला आहे. नदी, ओढ्यांमधून धरणात पाणी येत असल्याने जलसाठ्यात वाढ झाली होती. गेल्या सहा दिवसात खडकवासला धरण प्रकल्पाचा पाणीसाठा ६.५० टीएमसी पाणीसाठा झाला आहे. या प्रकल्पात २२.२९ टक्के पाणीसाठा झाला आहे. गेल्या वर्षी ७ जुलैरोजी या प्रकल्पात ६.४० टीएमसी पाणीसाठा होता. यंदा प्रथमच गेल्यावर्षी पेक्षा धरणातील पाणीसाठा वाढला आहे. यामुळे पाणी कपातीचे संकट तुर्तास टळले असल्याने पुणेकरांना मोठा दिलासा मिळाला आहे.