निष्ठावान कार्यकर्ती आणि सेवाव्रती लोकप्रतिनिधीला आपण मुकलो - सुधीर मुनगंटीवार

लोकमान्य टिळकांच्या घराण्यातील सून म्हणून वावरतांना जनसेवेचा आणि जनजागरणाचा लोकमान्यांचा वसा त्यांनी पुढे चालविला

पुणे : भाजपच्या आमदार व माजी महापौर मुक्ता शैलेश टिळक यांचे गुरूवारी दीर्घ आजाराने निधन झाले. त्या 57 वर्षांच्या होत्या. त्यांच्या मागे पती शैलेश टिळक, मुलगा कुणाल टिळक, मुलगी चैत्रीली टिळक, सून, जावाई असा परिवार आहे. मागील काही महिन्यांपासून त्या कर्करोगाशी झुंजत होत्या. मुक्ता टिळक यांच्या निधनामुळे एका निष्ठावान कार्यकर्तीला आणि सेवाव्रती लोकप्रतिनिधीला आपण मुकलो आहोत, अशा शब्दात वने, सांस्कृतिक कार्य आणि मत्स्यव्यवसाय मंत्री सुधीर मुनगंटीवार यांनी शोक व्यक्त केला आहे.

मुक्ता टिळक गेले काही महिने गंभीर आजाराशी झुंजत होत्या. त्याही परिस्थितीत त्या विधान परिषद आणि राज्यसभा निवडणुकीसाठी स्ट्रेचरवरून उपस्थित राहिल्या होत्या, असे सांगून मुनगंटीवार पुढे म्हणाले की, मुक्ताताईंनी आपल्या कृतीतून कार्यकर्त्यांसमोर एक आदर्श उभा केला आहे. लोकमान्य टिळकांच्या घराण्यातील सून म्हणून वावरतांना जनसेवेचा आणि जनजागरणाचा लोकमान्यांचा वसा त्यांनी पुढे चालविला. भाजपाचे काम करतांना त्यांचे सेवाव्रती व्यक्तिमत्व बहरून आले. पुण्याच्या महापौर म्हणून त्यांनी आपला ठसा जसा उमटवला तसेच कसबा पेठ मतदारसंघाच्या आमदार म्हणून मिळालेल्या अल्पकाळातही त्यांनी आपले नाव जनमानसात कोरले. कोरोना काळात आणि त्यापूर्वी त्यांनी केलेली जनसेवा पुणेकर आणि भाजपा कार्यकर्ते विसरणार नाहीत.

''आम्ही टिळक कुटुंबीयांच्या दुःखात सहभागी आहोत. ईश्वर मुक्ताताईंना सद्गती देवो आणि त्यांच्या कुटुंबीय आणि मित्र परिवार व कार्यकर्त्यांना या दुःखातून लवकर सावरण्याचे बळ देवो अशी प्रार्थनाही मुनगंटीवार यांनी केली आहे.'' 

राजकीय कारकीर्द

पालिकेची पहिली निवडणुक २००२ साली लढवून विजयी झाल्या. २००७, २०१२, २०१७ अशा सलग चारवेळा नगरसेवक झाल्या. २०१७ ते २०१९ या काळात महापौरपदी विराजमान् झाल्या. २०१९ मध्ये कसबा पेठ विधानसभा मतदारसंघातून विधानसभेची उमेदवारी दिली आणि त्या आमदार झाल्या.भाजप शहर उपाध्यक्षा, महिला आघाडीच्या माजी अध्यक्षा, भाजपच्या प्रदेश महिला आघाडीच्या उपाध्यक्षा, कोषाध्यक्ष, प्रदेश कार्यकारिणी सदस्य आदी पदेही भूषविले आहेत. त्यांनी लोकमान्य टिळक विचार मंच या संस्थेच्या माध्यमातून सामाजिक क्षेत्रात भरीव कामगीरी केली आहे.