‘आम्ही इथले दादा म्हणत दहशत पसरविण्याचा प्रयत्न; चार जणांवर गुन्हा दाखल

पुणे : आमच्या वस्तीमध्ये का आला, आम्ही इथले भाई आहोत, असे म्हणून शिवीगाळ आणि लाथाबुक्यांनी मारहाण करणाऱ्या आणि दहशत पसरविणाऱ्या चौघांवर हडपसर पोलीस स्टेशनमध्ये गुन्हा दाखल करण्यात आला आहे. दि. १६ जून रोजी हडपसर येथील वैदवाडी गोसावी वस्तीमध्ये रात्री पावणेआठच्या सुमारास हा प्रकार घडला.

याप्रकरणी राहुल आलकुंटे (वय ३०, रा. हडपसर) यांनी फिर्याद दिली आहे. पोलिसांनी दिलेल्या माहितीनुसार, फिर्यादी यांच्या चुलत भावांना आमच्या वस्तीमध्ये का आला, असा जाब विचारत शिवीगाळ व लाथाबुक्यांनी मारहाण केली. फिर्यादी यांचे चुलते व त्यांची दोन्ही मुले आरोपींच्या घरासमोर गेले असता, आरोपींनी आमच्या घरी यायची हिंमत कशी झाली? तुम्हाला सोडत नाही, असे म्हणून शिवीगाळ करून फिर्यादीच्या डोक्यात कोयत्याने वार करून गंभीर जखमी केले व त्यांच्या हातातील कोयते हवेत फिरवत ‘आम्ही इथले दादा आहोत, कोण समोर आला, तर त्याला जिवंत ठेवणार नाही, याद राखा’, असे सांगत दहशत आणि भीतीचे वातावरण निर्माण केले. या प्रकरणाचा पुढील तपास पोलीस उपनिरीक्षक सागर पोमण करीत आहेत.

--------------------------------