गोळीबार प्रकरणात तुम्हाला पण अडकवू

लोकमत न्यूज नेटवर्क

माळेगाव : रविराज तावरे गोळीबार प्रकरणी कारखान्याचे अध्यक्ष बाळासाहेब तावरे यांचे पुतणे रणजित तावरे यांनी आपल्याला धमकी देण्यात आल्याचे समाज माध्यमांवर पोस्ट लिहीत आरोप केला आहे. त्यामुळे पुन्हा एकदा माळेगाव हादरले असून या प्रकाराची उलटसुलट चर्चा सुरू आहे.

रविराज तावरे यांच्यावर गोळीबार झाल्यानंतर मोरे टोळीवर मोका लावण्यात आला. दोनच दिवसांपूर्वी या प्रकरणात माजी सरपंच जयदीप दिलीप तावरे यांना अटक करण्यात आली होती. याचे तीव्र पडसाद गावात उमटले. त्यांना खोट्या गुन्ह्याबाबत अटक करण्यात आल्याचे म्हणत त्यांच्या समर्थनार्थ गाव बंद करण्यात आले. याप्रकरणी रणजित तावरे यांनी समाज माध्यमांवरून संदेश पाठवत मला फिर्यादीच्या नातेवाईकांकडून तुला पण गुन्ह्यात अडकवू, अशी धमकी येत असल्याबद्दल खुलासा केला आहे. या संदेशामुळे गावात एकच खळबळ उडाली आहे. समाज माध्यमावरील या पोस्टमुळे गोळीबार प्रकरणाला वेगळे वळण लागण्याची शक्यता आहे. या प्रकरणाचे पडसाद उमटण्याची शक्यता असल्याने पोलीस प्रशासन सतर्क आहे.

रणजित तावरे यांची फेसबुक पोस्ट...

‘मला अप्रत्यक्ष ३१ मेच्या फिर्यादीच्या निकटवर्तीयांकडून धमकी मिळत आहे. आम्ही तुला या गुन्ह्यात अडकवू, मला जे कोणी आहेत त्यांना सांगणे आहे की तुम्ही पाहिजेत ते खुशाल करा. हा पट्ट्या न डरेगा ना पीछे हटेगा. कारण नीतीमत्ता स्वच्छ आहे.’ हा संदेश व्हायरल होत आहे.

फोटो ओळी : रणजित तावरे यांनी सोशल मीडियावर लिहिलेली पोस्ट.

१००७२०२१-बारामती-१४