मुलीला भेटायला निघाले अन् काळाने घाला घातला; अष्टविनायक महामार्गावर वडिलांचा अपघाती मृत्यू

अष्टविनायक महामार्गावर अपघाताची मालिका सुरू असून अनेक जणांनी प्राण गमावले आहेत.

कवठे येमाई : मलठण रस्त्यावरील रावडेवाडी हद्दीत शिवाजी मारुती जाधव ( वय ६५ वर्ष ) रा.पिंपरखेड यांच्या टू व्हीलरला अज्ञात वाहनाने जोरदार धडक दिल्याने अपघातात जागेवरच मृत्यू झाला आहे. अज्ञात वाहन घटनास्थळावरून पळून गेले आहे.

शिवाजी जाधव हे पिंपरखेडवरुन कवठेमार्गे शिक्रापूरला आपल्या मुलीकडे भेटायला होंडा शाईन मोटारसायकलवरून चालले होते. अष्टविनायक महामार्गावर रावडेवाडी येथील पराग अॅग्रो साखर कारखान्याकडे जाणाऱ्या रस्त्यालगत हा अपघात झाला आहे. मोटारसायकलचा पुर्णपणे चक्काचूर झाला आहे. सदर ठिकाणी तीव्र उतार असल्याने कवठ्याच्या बाजूने येणारी वाहने दिसत नाही. तसेच सदर ठिकाणी कारखान्याकडे जाण्यासाठी रस्ता असल्याने वळण घेताना अपघात होत आहे. घटनास्थळी पोलिसांनी दाखल होऊन पुढील कार्यवाही करण्यात आली आहे.
 
नुकतेच अष्टविनायक रस्त्याचे काम पुर्ण झाले असून वाहने भरधाव वेगाने पळत आहे. वाहन चालकांनी शिस्तीने वाहने चालवणे गरजेचे असून स्पीड बेकर बसवण्याची मागणी सामाजिक कार्यकर्ते दत्ता गडदरे,सरपंच भाऊसाहेब किठे, व नागरीकांनी केली आहे.याच महामार्गावर भाऊसाहेब चव्हाण रा. शिरसगाव काटा यांचा दि. २२ एप्रिल रोजी टू व्हीलरवर शिंदेवाडीतील पीराचा दर्गा येथे अपघातात जागीच मृत्यू झाला होता. अपघाताची मालिका सुरू असून या रस्त्यावर अनेक जणांचे जीव गेले आहेत. तर अनेक जण गंभीर जखमी झाले आहेत.