माझी बायको होशील का? 14 वर्षीय मुलाचे 13 वर्षीय मुलीसाठी इंस्टाग्राम स्टेटस

मुलीच्या आईने दिलेल्या तक्रारीनंतर या मुलाविरोधात गुन्हा दाखल

पुणे प्रतिनिधी/किरण शिंदे : पुण्याच्या हडपसर परिसरात एक धक्कादायक प्रकार उघडकीस आला आहे. एका नामांकित शाळेत शिक्षण घेणाऱ्या 14 वर्षीय वयाच्या मुलाने 13 वर्षीय मुलीचा विनयभंग केला. या मुलाने पीडित मुलीचा फोटो घेऊन माझी बायको होशील का? असं स्टेटस इंस्टाग्राम अकाउंट वर ठेवले होते. पीडित मुलीच्या आईने दिलेल्या तक्रारीनंतर या मुलाविरोधात गुन्हा दाखल करण्यात आला आहे.

याप्रकरणी अधिक माहिती अशी की, पीडित मुलगी आणि आरोपी मुलगा दोघेही एकाच शाळेत शिक्षण घेतात. हडपसर परिसरात एकाच ठिकाणी राहण्यासाठी देखील आहेत. मात्र मागील काही दिवसांपासून हा मुलगा पीडित मुलीचा पाठलाग करत होता. मैत्री करावी यासाठी तिला धमकावत होता. माझ्यासोबत मैत्री कर अन्यथा उचलून घेऊन जाईल अशी धमकीच त्याने या मुलीला दिली होती. परंतु मुलीने मात्र शेवटपर्यंत त्याला भीक घातली नाही. 

मुलगी आपल्याला भीक घालत नाही हे लक्षात आल्यावर या मुलाने तिचा फोटो घेऊन माझी बायको होशील का असे स्टेटस इंस्टाग्राम अकाउंटवर ठेवले होते. त्यानंतर मात्र मुलीने हा सर्व प्रकार आईला सांगितला. आईने याप्रकरणी हडपसर पोलीस स्टेशन गाठून तक्रार दिली. पोलीसांनी या मुलावर विनयभंग व पोस्कोनुसार गुन्हा नोंद केला आहे. अधिक तपास पोलीस करत आहेत.