ट्रॅक्टरखाली आल्याने महिलेचा मृत्यू

पुणे : महमंदवाडी येथे महिला ट्रॅॅक्टरवरून खाली पडल्यानंतर चढावरून ट्रक्टर अचानक मागे आल्याने चाकाखाली आलेल्या महिलेचा मृत्यू झाला.

नंदा अशोक यादव (वय ४४, रा. राजीव गांधी कॉलनी, तरवडे वस्ती, महमंदवाडी) असे मृत्यू झालेल्या महिलेचे नाव आहे. टॅक्टरचालक महावीर अर्जुन पटेकर (रा. कवडेपाठ, कदमवाक वस्ती, लोणी) यांच्यावर गुन्हा दाखल करण्यात आला आहे.

नंदा यादव या गृहिणी होत्या. तर त्यांचे पती माळी काम करतात. त्यांचे महमंदवाडी पोलिस चौकीच्या मागे तरवडेवस्ती येथे घर आहे. त्यांनी घरात कोबा करण्याचे काम काढले होते. या कामासाठी आवश्यक असणारे साहित्य घेऊन त्या मंगळवारी दुपारी त्यांच्या ट्रॅक्टर ट्रॉलीमध्ये बसून घरी चालल्या होत्या. परंतु, त्यांच्या घराच्या अलीकडे महमंदवाडी चौकीच्या मागे तरवडे वस्तीवर जाण्यासाठी मोठा चढ आहे. टॅक्टर चढावर चढत असताना नंदा यादव अचानक खाली पडल्या. ही घटना चालक महावीर पटेकर याला समजल्यानंतर त्याने ट्रॅक्टरवर नियंत्रण मिळवण्याचा प्रयत्न केला. परंतु, ट्रॅक्टर उतारामुळे खाली आल्यामुळे ट्रॅक्टरचे चाक नंदा यादव यांच्या बरगडीवर गेले. त्यांच्या बरगडीची हाडे तुटली आणि फुफुस्साला गंभीर जखम झाल्याने मोठ्या प्रमाणावर रक्तस्त्राव होऊन त्यांचा अपघाती मृत्यू झाला. उपनिरीक्षक भोलेनाथ अहिवळे अधिक तपास करत आहेत.