मैत्रिणीशी गप्पा मारत थांबलेल्या महिलेचा टेम्पोच्या धडकेत मृत्यू; अपघातानंतर टेम्पोचालक पसार

कात्रज घाटातून पुण्याकडे निघालेल्या भरधाव टेम्पोने रस्त्याच्या कडेला थांबलेल्या महिलेला धडक दिली, महिलेचा पतीही जखमी

पुणे : मैत्रिणीबरोबर गप्पा मारत थांबलेल्या महिलेचा टेम्पोच्या धडकेत मृत्यू झाला. या अपघातात एक दाम्पत्यदेखील जखमी झाल्याची घटना पुणे-सातारा रस्त्यावरील कात्रज भागात घडली. अपघातानंतर पसार झालेल्या टेम्पो चालकाविरोधात पोलिसांनी गुन्हा दाखल केला आहे.

दीपाली वैभव बर्गे असे मृत महिलेचे नाव आहे. अपघातात पर्वती आदिनाथ वायदंडे (५०, रा. साईराज बिल्डिंग, मांगडेवाडी, कात्रज) आणि त्यांचे पती आदिनाथ जखमी झाले. पर्वती यांनी याबाबत भारती विद्यापीठ पोलिस ठाण्यात फिर्याद दिली आहे.

पोलिसांनी दिलेल्या माहितीनुसार दीपाली, त्यांची मैत्रीण पर्वती, पती आदिनाथ शनिवारी (दि. ९) रात्री आठच्या सुमारास कात्रज भागातील मांगडेवाडी परिसरात गप्पा मारत थांबले होते. त्यावेळी कात्रज घाटातून पुण्याकडे निघालेल्या भरधाव टेम्पोने रस्त्याच्या कडेला थांबलेल्या दीपाली यांना धडक दिली. पर्वती आणि त्यांचे पती आदिनाथ यांना धडक देऊन टेम्पोचालक घटनास्थळी न थांबता पसार झाला.

अपघातानंतर नागरिकांनी दीपाली, पर्वती आणि त्यांचे पती आदिनाथ यांना रुग्णालयात दाखल केले. उपचारादरम्यान दीपाली यांचा रुग्णालयात मृत्यू झाला. अपघाताची माहिती मिळताच वरिष्ठ पोलिस निरीक्षक शरद झिने यांनी घटनास्थळी भेट दिली. अपघातानंतर पसार झालेल्या टेम्पाे चालकाचा शोध घेण्यात येत असून, पोलिसांनी कात्रज भागातील सीसीटीव्ही चित्रीकरण तपासले आहे. पोलिस उपनिरीक्षक शिंदे तपास करत आहेत.