ट्रेलरला धडकून युवती ठार

आपल्या ताब्यातील दुचाकीवरून क्लाससाठी चाकणकडे निघालेली महाविद्यालयीन युवती रस्त्यालगत उभ्या असलेल्या ट्रेलरला धडकून जागीच ठार झाली.

चाकण : आपल्या ताब्यातील दुचाकीवरून क्लाससाठी चाकणकडे निघालेली महाविद्यालयीन युवती रस्त्यालगत उभ्या असलेल्या ट्रेलरला धडकून जागीच ठार झाली.
सकाळी पावणेसातच्या सुमारास चाकण-शिक्रापूर रस्त्यावरील मेदनकरवाडी (ता. खेड) हद्दीतील तिरंगा हॉटेलसमोर हा अपघात घडला. या प्रकरणी ट्रेलरचालकावर गुन्हा दाखल करण्यात आल्याची माहिती पोलीस निरीक्षक दगडू बोंडू पाटील यांनी दिली.
ऋतुजा श्यामराव कड (वय १६, रा. कडाचीवाडी, चाकण) असे या अपघातात ठार झालेल्या दुर्दैवी महाविद्यालयीन युवतीचे नाव आहे. महावीर पतसंस्थेचे संचालक शशिकांत पांडुरंग लष्करे (वय ३३, रा. कडाचीवाडी, ता. खेड) यांनी या घटनेची खबर चाकण पोलीस ठाण्यात दिली. येथील पोलिसांनी दिलेली माहिती अशी : ऋतुजा ही आज (दि. २०) सकाळी पावणेसातच्या सुमारास कडाचीवाडी येथून दुचाकीवरून चाकणकडे येत होती.
चाकणमध्ये पोहोचण्यापूर्वीच मेदनकरवाडीलगत रस्त्याच्या कडेला उभ्या असलेल्या ट्रेलरला (एचआर ३८-एन ७९११) तिची दुचाकी (एमएच १४-बीजे २२३) पाठीमागून जोरात धडकून हा विचित्र अपघात झाला. या अपघातात ऋतुजा हिच्या हनुवटीला गंभीर मार लागल्याने ती जागीच मरण पावली. (वार्ताहर)