पक्षासाठी काम करा स्वतःसाठी नको

पुणे : “काम करताना ते स्वतःसाठी नको तर पक्षासाठी करा, पक्ष त्यातून बळकट होईल,” असा सल्ला पशुसंवर्धन, दुग्धविकास, क्रीडा, युवक मंत्री व काँग्रेसचे पुण्याचे संपर्क मंत्री सुनील केदार यांनी दिला.

काँग्रेस भवनात केदार यांनी शहर व जिल्ह्यातील काँग्रेस पदाधिकाऱ्यांची आढावा बैठक शनिवारी घेतली. शहराध्यक्ष रमेश बागवे यांनी त्यांचे स्वागत केले. केदार म्हणाले, पक्षाने माझ्यासाठी काय केले याऐवजी पक्षासाठी मी काय करू शकतो याचा विचार करा. पक्ष त्यातूनच मोठा होईल.

नगरसेवक अविनाश बागवे यांनी सूत्रसंचालन केले. विशाल मलके यांनी आभार व्यक्त केले. प्रदेश उपाध्यक्ष मोहन जोशी, जिल्हा काँग्रेसचे अध्यक्ष संजय जगताप, पिंपरी-चिंचवडचे अध्यक्ष सचिन साठे, दीप्ती चवधरी, कमल व्यवहारे, महेश ढमढेरे यांनी मनोगत व्यक्त केले. प्रदेश सरचिटणीस ॲड. अभय छाजेड, महाराष्ट्र प्रदेश एनएसयूआय अध्यक्ष अमीर शेख, गोपाळ तिवारी, कैलास कदम, वीरेंद्र किराड, नीता रजपूत आदी यावेळी उपस्थित होते.