हो... आमचाही कुणीतरी पाठलाग करतंय! मुलींनी व्यक्त केले त्यांचे अनुभव

रात्रीची दहा-साडेदहाची वेळ... आॅफिसमधून निघायला उशीर झाल्याने बसस्टॉपवर पोहोचण्याची तिची लगबग... आॅफिसपासून बसस्टॉपला जात असताना एक तरुण पाठलाग करीत असल्याचे तिच्या लक्षात आले...

पुणे : रात्रीची दहा-साडेदहाची वेळ... आॅफिसमधून निघायला उशीर झाल्याने बसस्टॉपवर पोहोचण्याची तिची लगबग... आॅफिसपासून बसस्टॉपला जात असताना एक तरुण पाठलाग करीत असल्याचे तिच्या लक्षात आले... तिची पावले वेगाने पडू लागली... बसची वाट पाहत उभी असताना तो पुन्हा तिच्या बाजूला येऊन उभा राहिला... काही वेळ उलटल्यावर त्याने तिच्याकडे पाहून अश्लील हावभाव करण्यास सुरुवात केली... ती घाबरून मदतीच्या आशेने आजूबाजूला पाहत असतानाच त्याने चक्क तिच्यासमोर हस्तमैथुन करण्यास सुरुवात केली... काय करावे हे तिला कळेना... रस्ता ओलांडून एका रिक्षाला हात करुन तिने तिथून पळ काढला. सीएसटी स्टेशनवर रेल्वेमध्ये तरुणींसमोर बसून तरुणाने केलेले हस्तमैथुन, पोलिसांनी त्याबाबत दाखवलेली उदासीनता, मुंबईतील तरुणीचा घरापर्यंत पाठलाग केल्याच्या घटनेला आठवडा उलटत नाही तोच गुरुवारी मध्यरात्री कामाहून घरी परतणाºया एका २५ वर्षांच्या तरुणीचा दोन मोटरसायकलस्वार तरुणांनी केलेला पाठलाग अशा अनेक घटना नव्याने समोर येत आहेत.

या घटनेमुळे सर्वत्र खळबळ उडाली असून पुण्या-मुंबईसारख्या शहरांमध्ये नोकरदार महिला, मुलींच्या सुरक्षेचा प्रश्न पुन्हा ऐरणीवर आला आहे. या पार्श्वभूमीवर अनेक महिला, तरुणींशी संवाद साधला असता, बºयाचदा अशा प्रसंगाना निमूटपणे सामोरे जावे लागत असल्याची भावना त्यांनी ‘लोकमत’शी बोलताना व्यक्त केली. याबाबत पोलिसांची मदत घेण्याबरोबरच तरुणींनी धाडसी होऊन स्वसंरक्षणासाठी सज्ज व्हायला हवे, अशी अपेक्षाही व्यक्त करण्यात आली.

अनुभव १ : रस्त्यावरून एकटीच चालले होते. एक मुलगा मागून गाडीवरून शेजारी येऊन थांबला. मी या परिसरात नवीन राहायला आलो आहे. एकटाच असतो, कोणी कामवाली बाई असतील तर मिळवून द्या. मग एकदमच तू काय करतेस वगैरे अशी त्याची भाषा सुरू झाली. मी स्वत:च घरकाम करते म्हटले तुमचा नंबर द्या, आईला विचारून सांगते. त्या इथेच राहातात का? असे विचारल्यावर मी नाही म्हटले. उगाचच काहीतरी बोलत होता. त्याचा हेतू चांगला नाही हे समजल्यावर मी पुढे चालू लागले तर तो मागे आला बाईकवरून सोडू का? असे विचारायला लागला. मी ‘नो थँक्स’ म्हणून एका सोसायटीमध्ये शिरले आणि दुस-या सोसायटीच्या गेटने बाहेर पडले.
- राजश्री, शिक्षिका

अनुभव २ : रात्री शास्त्री रस्त्याच्या बाजूने दांडेकर पूलावरून मुलगी आणि मी आम्ही दोघी घरी जात होतो. तिथून दोन मुलांनी आमचा पाठलाग सुरू केला. आमच्या बाजूने येऊन दोघेही अर्वाच्य अश्लील भाषेत बोलत होते. आम्ही मित्रमंडळ चौकात गाडी घातली, मात्र तिथे पुढे जाऊन ते थांबले होते. ते काही केल्या आमचा पिच्छा सोडत नव्हते. पोलिसांनाच फोन करू असे मुलगी म्हटली. चुकामुक झाली आणि आम्ही कशातरी घरात पोहोचलो. इतक्या घाबरलो होतो की आम्हाला काही सुधरतच नव्हते. - माधुरी, गृहिणी

अनुभव ३ : काही दिवसांपूर्वीच एक प्रसंग माझ्याबाबतीत घडला होता. त्या व्यक्तीने माझा खूप वेळ पाठलाग केला बोलला काही नाही पण मला याची भीती वाटत होती की तो जर काही बोलला तर मी काय बोलू त्यावेळी मी खूप घाबरले होते मात्र तसे न दाखवता मी त्याकडे दुर्लक्ष केले. भीत भीत घरी आले. नंतर मीच रस्ता बददला. - दिपा चव्हाण, नोकरदार महिला