चोरीच्या संशयावरून मारहाण केल्याने तरुणाचा मृत्यू

लोकमत न्यूज नेटवर्क

मंचर : चोरी केल्याच्या संशयावरून जबर मारहाण केल्यामुळे विकी गणपत भोसले (वय २४) या तरुणाचा मृत्यू झाला आहे. याप्रकरणी मंचर पोलीस ठाण्यात ४ जणांविरुद्ध खुनाचा गुन्हा दाखल झाला आहे. याप्रकरणी मार्तंड ऊर्फ योगेश गणपत भोसले यांनी फिर्याद दिली आहे.

मंचर पोलिसांनी दिलेल्या माहितीनुसार शनिवारी (दि. १४) रात्री ८ ते ८.३० च्या सुमारास मंचर शहरातील मुळेवाडी रस्त्यावर पिंटू ऊर्फ रवींद्र दौलत थोरात यांच्या बांधकाम व्यवसायाच्या कार्यालयात गणेश पांडुरंग बोऱ्हाडे, संतोष सुखदेव जाधव, सार्थक संजय वळसे व पिंटू ऊर्फ रवींद्र दौलत थोरात (सर्व रा. मुळेवाडी, मंचर, ता. आंबेगाव) यांनी गणेश बोऱ्हाडे यांच्या जय अंबे किराणा दुकानात चोरी केल्याच्या संशयावरून विकी भोसले यास शिवीगाळ करून लाथाबुक्क्यांनी जबर मारहाण केली. यात विक्री गंभीर जखमी झाला होता. विकीला मंचर उपजिल्हा रुग्णालयात प्राथमिक उपचार करून पुढील उपचारासाठी पुण्यात नेत असताना त्याचा वाटेत मृत्यू झाला.

विकीचा भाऊ मार्तंड ऊर्फ योगेश गणपत भोसले यांनी गणेश पांडुरंग बोऱ्हाडे, संतोष सुखदेव जाधव, सार्थक संजय वळसे व पिंटू ऊर्फ रवींद्र दौलत थोरात यांच्याविरुद्ध विकी यास ठार मारल्याप्रकरणी फिर्याद दाखल केली आहे. उपविभागीय पोलीस अधिकारी अनिल लंभाते यांनी तत्काळ घटनास्थळी भेट देऊन पुढील तपास संदर्भात मंचर पोलिसांना सूचना केल्या आहेत.