पुण्यात एकतर्फी प्रेमातून मुलीवर केले वार नंतर तरूणाने कापली स्वतःची शिर

वडगाव शेरीत एकतर्फी प्रेमातून मुलीवर वार करणाऱ्या तरूणाने स्वतःची शिर कापली

पुणे: आज पुण्यात वडगाव शेरीत दहावीत शिकणाऱ्या विद्यार्थिनीवर चाकूने वार झाल्याची घटना घडली. ज्या तरूणाने विद्यार्थिनीवर वार केले आहेत त्याने स्वतःची शिर कापून घेऊन त्याने विषारी औषधही प्राशन केले असल्याची माहिती समजतेय. या तरूणाला खराडी येथील खाजगी रुग्णालयात दाखल करण्यात आले आहे. हा तरूण त्या विद्यार्थिनीच्या शेजारीच राहणारा आहे. हा हल्ला तरूणाने एकतर्फी प्रेमातून घडल्याचे सांगितले जात आहे.

राज्यभरात उद्यापासून दहावीची परीक्षा सुरु होत आहे. सर्व विद्यार्थी लेखी परीक्षा देण्यासाठी उत्सुक असल्याचे दिसून येत आहे. काहींनी तर धास्तीही घेतली आहे. त्यातच पुण्यातील वडगाव शेरी भागात दहावीत शिकणाऱ्या विद्यार्थिनीवर चाकूने वार केल्याची धक्कादायक घटना घडली आहे. सोमवारी सकाळी माथेफिरू तरुणाने एकतर्फी प्रेमातून तीक्ष्ण हत्याराने वार करून हल्ला केल्याचे समोर आले आहे. 

या हल्ल्यात विद्यार्थीनी गंभीर जखमी झाली असून तिच्यावर वडगाव शेरी येथील सिटी हॉस्पिटल येथे उपचार सुरू आहेत. घटनास्थळी येरवडा पोलीस स्टेशन सह वरिष्ठ पोलीस अधिकारी दाखल झाले असून गुन्हा दाखल करण्याचे काम सुरू करण्यात आले आहे. एक तर्फी प्रेमातून शाळेच्या आवारात जाऊन विद्यार्थिनीवर तीक्ष्ण हत्याराने हल्ला केल्याच्या घटनेमुळे पुन्हा एकदा शालेय विद्यार्थ्यांच्या सुरक्षेचा प्रश्न ऐरणीवर आला आहे.