Pune Crime: नदीपात्रातील उद्यानामध्ये तरुणाने घेतला गळफास; खडकी परिसरातील घटना

खडकी येथील होळकर पूल परिसरात नदीपात्रामध्ये उद्यान आहे...

पुणे : खडकी येथील होळकर पूल परिसरात नदीपात्रातील उद्यानामध्ये एका तरुणाने झाडाला गळफास घेऊन आत्महत्या केल्याची घटना उघडकीस आली आहे. अमोल रमेश मंगळवेढेकर (वय ३५, रा. वडारवाडी, शिवाजीनगर), असे आत्महत्या केलेल्या तरुणाचे नाव असून, आत्महत्येचे कारण मात्र समजू शकले नाही.

खडकी येथील होळकर पूल परिसरात नदीपात्रामध्ये उद्यान आहे. तेथील झाडाला गळफास घेऊन तरुणाने आत्महत्या केली. नेहमीप्रमाणे पहाटे उद्यानात फिरायला आलेल्या नागरिकांना ही बाब निदर्शनास आली. त्यांनी तत्काळ विश्रांतवाडी पोलिसांना कळविले. त्यानंतर पोलिसांनी घटनास्थळी भेट दिली. त्याच्याकडील कागदपत्रांवरून पोलिसांनी ओळख पटवली.

अमोलच्या आत्महत्येमागचे निश्चित कारण समजू शकले नाही. त्याचा कोणाशी वाद झाला का, यादृष्टीने पोलिसांकडून तपास करण्यात येत आहे. याप्रकरणी विश्रांतवाडी पोलिस ठाण्यात अकस्मात मृत्यू अशी नोंद करण्यात आली आहे.