तरुणाचा चौघांकडून निर्घृण खून

चौघांनी एकाचा धारदार शस्त्राने वार करून व डोक्यात दगड घालून निर्घृण खून केला. थेऊर (ता. हवेली) पोलीस मदत केंद्रापासून सुमारे १५० फूट अंतरावर मागील बाजूला असलेल्या बाजारतळांवर

लोणी काळभोर : चौघांनी एकाचा धारदार शस्त्राने वार करून व डोक्यात दगड घालून निर्घृण खून केला. थेऊर (ता. हवेली) पोलीस मदत केंद्रापासून सुमारे १५० फूट अंतरावर मागील बाजूला असलेल्या बाजारतळांवर ही घटना १२ जून रोजी रात्री आठच्या सुमारास घडली. खुनाचे कारण अद्याप स्पष्ट झालेले नाही. एका तासात गुन्हे शोध पथकाने चौघांना ताब्यात घेण्यात यश मिळविले.
रोहन प्रकाश चव्हाण (वय १९, रा. चव्हाणवस्ती, थेऊर) असे खून झालेल्याचे नाव आहे. त्याचा मित्र सुजित संजय सावंत (रा. चव्हाणवस्ती, थेऊर) याने दिलेल्या फिर्यादीवरून पोलिसांनी दादा ऊर्फ आकाश विकास कांबळे (वय १९, रा. भीमनगर वस्ती, थेऊर), अक्षय भगवान शेडगे (वय २२), गोपाळ महादेव इंगोले (वय १८, दोघेही रा. डी टाइप कॉलनी, थेऊर) व मयूर ऊर्फ जयवंत काकडे (वय २१, रा. कुंजीर कॉम्लेक्स, थेऊर) यांना ताब्यात घेण्यात आले आहे. या चौघांनाही आज शिवाजीनगर (पुणे) येथील न्यायालयात हजर करण्यात आले, त्या वेळी न्यायदंडाधिकाऱ्यांनी त्यांना पोलीस कोठडीत ठेवण्याचे आदेश दिले. (वार्ताहर)

- आज (दि. १३ जून) दुपारी रोहन चव्हाण याच्यावर अंत्यसंस्कार करण्यात आले. स्मशानभूमीतून घराकडे परत फिरताना जमाव संतप्त झाला. त्यातील काही जणांनी एका हॉटेलवर दगडफेक केली. तर, एक दुचाकी व एक चार चाकीही रागाचा बळी ठरल्या. नुकसान झाले आहे. परंतु, वेळीच पोलिसांनी हस्तक्षेप केल्यामुळे जास्तीचे नुकसान टळले.