९० वर्षांचा अनुभव वजा झाला : निवास साळाेखे

लांजा : पोलीस खात्यातील या तीन अधिकाऱ्यांच्या सेवानिवृत्तीने पोलीस खात्यातील ९० वर्षांचा अनुभव वजा झाला, असे भावनिक प्रतिपादन उपविभागीय पोलीस अधिकारी निवास साळोखे यांनी लांजा येथे केले.

लांजा पोलीस ठाण्याचे पोलीस निरीक्षक अनिल गंभीर तसेच देवरूख येथील उपनिरीक्षक प्रकाश बाईंग आणि नाटेचे सहायक पोलीस उपनिरीक्षक विवेक तोडकर यांच्या सेवानिवृत्तीपर सत्काराचा कार्यक्रम लांजा येथील संकल्प सिद्धी सभागृहात पार पडला. यावेळी प्रमुख पाहुणे म्हणून उपविभागीय पोलीस अधिकारी निवास साळोखे बोलत होते. यावेळी लांजाचे प्रांताधिकारी पोपट ओमासे, लांजा तहसीलदार समाधान गायकवाड, प्रकाश बाईंग, विवेक तोडणकर, अनिल गंभीर व त्यांच्या पत्नी, पोलीस उपनिरीक्षक श्वेता पाटील उपस्थित होते.

या कार्यक्रमाच्या सुरुवातीला शहरातील मुस्लिम वेल्फेअर सोसायटी या संस्थेतर्फे पोलीस निरीक्षक अनिल गंभीर यांचा सत्कार करण्यात आला. तसेच देवरुख पोलीस ठाण्याचे प्रकाश बाईंग आणि नाटे पोलीस ठाण्याचे सहायक पोलीस उपनिरीक्षक विवेक तोडकर यांचाही सत्कार करण्यात आला.