कोरोनासोबत पाणीटंचाईचे संकटही तीव्र

जिल्ह्यात ३३ गावांतील ५१ वाड्यांमधील टँकर्सग्रस्तांना ११ टँकर्सनी पाणीपुरवठा करण्यात येत असून, तोही अपुरा पडत असल्याने लोक हैराण आहेत. टंचाईग्रस्त गावांमुळे जिल्ह्यात ५,४२३ लोकांना भीषण पाणीटंचाईची झळ बसली असून, त्यांची पाण्यासाठी वणवण सुरू आहे. त्यातच कोरोनामुळे जिल्ह्यात लॉकडाऊन असल्याने पाण्यासाठी हाल होत आहेत.

जिल्ह्यात दरवर्षी पाणीटंचाई उद्भवते. या टंचाईग्रस्तांमध्ये धनगरवाड्यांचा मोठा समावेश आहे. डोंगर-दऱ्यात वसलेल्या धनगरवाड्यांतील लोकांना पाण्यासाठी वणवण भटकंती करावी लागत आहे. जनावरांना पाणी नसल्याने ती तडफडू लागली आहेत. कडक उन्हामुळे पाण्याची पातळी खालावल्याने विहिरी, ओढे, नाले, विंधन विहिरी आटल्याने ही परिस्थिती ओढावली आहे.

दिवसेेंदिवस टंचाईग्रस्त गावे व वाड्यांमध्ये भर पडत आहे. भयंकर उकाडा होत असून, पाण्याची पातळी खालावली आहे. या टंचाईग्रस्तांना पाणीपुरवठा करताना शासनाची दमछाक होत आहे. लोकांची पाण्यासाठी वणवण भटकंती सुरू आहे.

जनावरांची पाण्यासाठी तडफड

टंचाईग्रस्त गावांना शासकीय ३ आणि खासगी ८, अशा केवळ ११ टँकर्सनी पाणीपुरवठा करण्यात येत आहे. मात्र, तोही अपुरा पडत असल्याने या टंचाईग्रस्तांना पाण्यासाठी वणवण भटकंती करावी लागत आहे, तसेच जनावरांचीही पाण्यासाठी तडफड होत आहे. जिल्ह्यात प्रशासनाकडून केवळ पिण्याच्या पाण्याची सोय करण्यात येते. त्यामुळे इतर वापरासाठी पाणी आणण्यास डोंगरदऱ्यातून पायपीट करावी लागत आहे.

टंचाईची कामे सुरू होण्यापूर्वी पावसाळा येणार

जिल्ह्यात पाणीटंचाई भासत असली तरी टंचाई कृती आराखड्यातील कामे सुरू झालेली नाहीत. अजूनही पाणीपुरवठ्याची कामे निविदास्तरावर आहेत. त्यामुळे गतवर्षीप्रमाणेच यंदाही जिल्ह्यावर कोरोनाचे सावट असतानाच पाणीटंचाईची भीषणताही वाढण्याची शक्यता निर्माण झाली आहे. त्यातच टंचाईची कामे सुरू होईपर्यंत पावसाळा येऊन पाणीटंचाई संपणार, अशी परिस्थिती दिसून येत आहे.

................................

टंचाईग्रस्त गावे, वाड्या व टँकर...

तालुका गावे वाड्या टँकर

मंडणगड ०१ ०१ ०१

रत्नागिरी ०२ ०६ ०१

खेड १० १९ ०४

चिपळूण ०७ ०९ ०१

संगमेश्वर ०७ १० ०२

लांजा ०५ ०५ ०१

राजापूर ०१ ०१ ०१

एकूण-- ३३ ५१ ११

.................................

वाड्या आणि लोकसंख्या

तालुका वाड्या लोकसंख्या

मंडणगड ०१ ६१०

रत्नागिरी ०६ १४१६

खेड १९ १३२०

चिपळूण ०९ ८२७

संगमेश्वर १० ९५९

लांजा ०५ ७१३

राजापूर ०१ २८

एकूण- ५१ ५४२३

रहीम दलाल