गुहागरातील अंगणवाडीसेविकांनी परत केले माेबाइल

असगोली : गुहागर तालुक्यातील ७ बीटमधील १८५ अंगणवाडीसेविकांनी शासनाने दिलेले मोबाइल हॅण्डसेट एकात्मिक बालविकास योजनेच्या कार्यालयात परत केले. निकृष्ट दर्जाचे हॅण्डसेट सातत्याने बिघडतात. दुरुस्तीचा खर्च अंगणवाडीसेविकांनाच करावा लागतो. पोषण ट्रॅकर ॲप वापरण्यामध्ये अडचणी येतात. त्यामुळे मोबाइल जमा करत असल्याचे अंगणवाडी कर्मचारी सभा मुंबईच्या गुहागर अध्यक्षा सारिका हळदणकर यांनी सांगितले.

सारिका हळदणकर म्हणाल्या की, केंद्र शासनाने पोषण ट्रॅकर हे मोबाइल ॲप विकसित केले. या ॲपवर अंगणवाडी क्षेत्रातील स्तनदा व गर्भवती मातांची माहिती, लाभार्थींची नावे, वजन, उंची, हजेरी आणि पोषण आहाराचे वाटप यांची माहिती दररोज भरणे अनिवार्य करण्यात आले होते. त्यासाठी प्रत्येक अंगणवाडीसेविकेला दोन वर्षांपूर्वी २ जीबी रॅमचा मोबाइल हॅण्डसेट देण्यात आला होता. परंतु, दोन वर्षांनी हॅण्डसेटमध्ये सातत्याने बिघाड सुरु झाला आहे. शासन दुरुस्तीचा खर्चही देत नाही. इंटरनेटचा वेग कमी असल्याने माहिती चटकन भरली जात नाही. ॲप इंग्रजीमध्ये असल्याने अनेक सेविकांना त्रयस्थाची मदत घ्यावी लागते. ॲपमध्ये चुकीचा तपशील खोडणे किंवा दुरुस्त करण्याचा पर्याय नाही. त्यामुळे अंगणवाडीसेविका वैतागल्या होत्या, असे त्यांनी सांगितले.

महाराष्ट्र राज्य अंगणवाडी कर्मचारी कृती समितीने महिला व बालकल्याणमंत्री, प्रधान सचिव, आयुक्त एकात्मिक बालविकास यांची भेट घेऊन अडचणी सांगितल्या. मात्र, केंद्र सरकारच्या अखत्यारितील विषय सांगत मान्यवरांनी समस्या सोडविण्यास असमर्थता दर्शवली. त्यामुळे ९ ऑगस्टला कृती समितीने उच्च न्यायालयात दाद मागितली आहे. त्याचा निकाल लागेपर्यंत ॲपवर माहिती न भरता आल्यास मानधन कापू नये, असे आदेश न्यायालयाने दिले.

त्यानंतर गुहागरमधील अंगणवाडीसेविकांनी नादुरुस्त मोबाइल जमा करण्याबाबतचे पत्र प्रकल्प अधिकारी एकात्मिक बालविकास योजना यांना दिले. त्याप्रमाणे १८५ अंगणवाडीसेविकांनी पर्यवेक्षिका अश्विनी पाटील आणि मोबाइल विभागाचे प्रमुख नितेश मालप यांच्याकडे जमा केले.