तुळसवडे येथे बिबट्याच्या हल्ल्यात वासरू ठार

राजापूर : तालुक्यातील तुळसवडे येथील एका गोठ्यात घुसून बिबट्याने एक वर्षाच्या वासराला ठार मारल्याची घटना रविवारी रात्री घडली़ त्या घटनेनंतर परिसरात प्रचंड घबराट पसरली आहे.

तुळसवडे येथील माजी उपसरपंच प्रकाश सदाशिव गराटे यांच्या घराजवळ त्यांचा गोठा आहे़ त्यामध्ये तीन जनावरे होती़ रविवारी रात्री दहा ते साडेदहाच्या दरम्यान एक बिबट्या गराटे यांच्या बंदिस्त गोठ्यात शिरला व त्याने गोठ्यात बांधलेल्या एक वर्षाच्या वासरावर हल्ला केला़ दरम्यान, बिबट्याच्या हल्ल्यानंतर गोठ्यातील अन्य दोन जनावरांची सुरू असलेली धडपड गराटे यांच्या पत्नीच्या लक्षात आली़ त्यानंतर प्रकाश गराटे व घरातील अन्य मंडळींनी गोठ्यात जाऊन पाहणी केली असता त्यांचे एक वर्षाचे वासरू जखमी अवस्थेत आढळले़ तत्पूर्वी बिबट्या गोठ्यातून पसार झाला होता़ काही वेळात जखमी वासरू मृत झाले़ दरम्यान, तुळसवडे गावचे उपसरपंच संजय कपाळे यांनी राजापूर वनविभागाला झालेल्या घटनेची माहिती दिली़ बिबट्याने गोठ्यात घुसून केलेल्या हल्ल्यात एक वासरू ठार झाल्याच्या घटनेने तुळसवडे परिसरात प्रचंड घबराट पसरली आहे़ मुक्त फिरणाऱ्या बिबट्याचा बंदोबस्त केला जावा, अशी मागणी करण्यात येत आहे़