ट्रक-बोलेरा पिकपच्या अपघातात चालक जखमी

लांजा : ट्रक आणि बोलेरो पिकअप या दोन वाहनांत समोरासमोर धडक होऊन झालेल्या अपघातात बोलेरो चालक गंभीर जखमी झाल्याची घटना शुक्रवारी सायंकाळी ४.४५ वाजेदरम्यान मुंबई-गोवा महामार्गावर लांजा नर्सिंग क्वार्टर्स येथे घडली. जखमी चालकाला अधिक उपचारासाठी रत्नागिरी शासकीय रुग्णालयात दाखल करण्यात आले आहे.

मालवण ते रत्नागिरी ट्रक चालक गणेश नीळकंठ खोटे (४९, रा. नाचणे, रत्नागिरी) हा आपल्या ताब्यातील ट्रक क्रमांक (एमएच ०८, डब्ल्यू ८६७७), तर मुंबई ते देवगड बोलेरो चालक आकाशकुमार शंकर गौंडा बुद्धिहाल (२०, सध्या रा. सिंधुदुर्ग, मूळगाव कर्नाटक) हा आपल्या ताब्यातील बोलेरो पिकअप क्रमांक (एमएच ०४, केएफ ७९५२) ही चुकीच्या दिशेने समोरून येणाऱ्या ट्रकवर जाऊन आदळली. शुक्रवारी सायंकाळी ४.४५ मिनिटांदरम्यान मुंबई-गोवा महामार्गावर लांजा शहरातील नर्सिंग क्वार्टर्सजवळ हा अपघात घडला.

या अपघातात बोलेरो पिकअप चालक आकाशकुमार बुद्धिहाल हा गंभीर जखमी झाला आहे. त्याच्यावर लांजा ग्रामीण रुग्णालयात प्राथमिक उपचार करून अधिक उपचारासाठी त्याला रत्नागिरी येथील जिल्हा शासकीय रुग्णालयात हलविण्यात आले. या अपघाताची खबर ट्रक चालकाने लांजा पोलिसांना दिली. अपघाताची माहिती मिळताच लांजाच्या पोलीस उपनिरीक्षक श्वेता पाटील, हेडकॉन्स्टेबल शांताराम पंदेरे, राजेंद्र कांबळे, सहायक पोलीस उपनिरीक्षक रमाकांत साळुंखे, महिला हेडकॉन्स्टेबल शैला लांबोर, सुगंधा दळवी, तृप्ती सावंत देसाई यांनी घटनास्थळी भेट देऊन पंचनामा केला.